Nongpoh, Nohprah 15: Kum kawei na ka thong ban pynduhjaid ia ka jingpang Pilio ha ka jylla bad ha ka ri hi baroh kawei, ka ophis u District MCH Officer ka Ri Bhoi mynta ka sngi ki la sdang ia ka jingai dawa Polio sha baroh ki khyllung kiba hapoh ka 5 snem shapoh, kaba dei ka thong ban pynduhjaid ia kane ka jingpang Polio.
Kum ban pynpaw, ka Ri India la pynbna ba ka dei ka ri kaba lah ban pynduhjaid ia ka jingpang Polio, hynrei namar ba dang don katto katne ki ri ba marjan bad ka India kiba dang shah ktah ha ka jingpang Polio, la pynlong ia kane ka jingai dawai Polio na ka bynta ban iada ia ki khyllung ban lait na ka jingpang Polio.
Ia kane ka jingsdang ban ai dawai Polio ia ki khynnah kaba la sdang mynta ka sngi ha Civil Hospital Nongpoh bad ba la buh por haduh 17 tarik mynta u bnai, la wan ban plie paidbah da ka Kong Balakyntiew Rani, Addition Deputy Commissioner ka Ri Bhoi kum ka Kongsan bad la sakhi lang ruh ha kane ka sngi da ka jingdon lang ka District Medical and Health Officer ka Ri Bhoi ka Dr. A.R. Marak, ka Medical Superintendent ka Civil Hospital Nongpoh ka Dr. D. Blah, u District MCH Officer u Dr. B.R Laitphlang, ki Nurse bad kynthup ki kmie ki kpa kiba la wan rah ia ki khun ban pyndih ia u dawai Polio.
Haba kren ha kane ka sngi kum ka kongsan, ka Kong Balakyntiew Rani, ADC ka Ri Bhoi, ka la ai mynsiem ia ki kmie ki kpa ba kin wan shakhmat ban pyndih ia u dawai Polio na ka bynta kito ki khynnah kiba hapoh 5 snem shapoh bad ban pynduhjaid ia kane ka jingpang donkam ka jingiatrei lang ki kmie ki kpa bad ki shnong khnang ba ka thong ka jong sorkar ban pynduhjaid ia kane ka jingpang Polio kan long kaba jop.
Shuh shuh, ka la kyntu ruh naduh ki Doctor, ki Nurse, ki ASHA, ki Aganwadi ba kin shim lang ia ka jingkitkhlieh ban pynthikna baroh ki khynnah kiba hapoh ka 5 snem ki dei ban wan shakhmat ban dih ia u dawai Polio bad kane ruh kan urlong ka dei tang lada ki kmie ki kpa ki ai ia ka jingiatrei lang ban pynpoi ia la ki khun sha ki jaka ai jingsumar bapher bapher ha ka District na ka bynta ban pyndih ia u dawai Polio, ka la bynrap.