Shillong, Nohprah 15: Ki nongtrei Muster Roll hapoh ka Jylla hynne ka sngi kila pynbna ban weng shwa iaki program iakhih hadien ba u Myntri Rangbah ka Jylla u la kular ban khot iakren halor ki mat jingdawa jong ki.

Ia kane la pynbna da u Bah Bympherlang PYndem, uba dei u General Secretary ka Joint Action Committee Muster Roll Worker Union (JACMRWU).

Haba pynbna ia kane ka rai, u Bah Bympherlang u la iathuh ba haka jingshisha ki nongtrei Muster Roll kila rai ban iakhih naduh ka 17 tarik Nohprah namar naka liang ka Sorkar kam shym la ai daka jingthoh ba ym lah ban pyntreikam iaka Floor Rate, VDA bad ka rta shongthait nalor kiwei ki mat jingdawa.

U Bah Bympherlang u la ong ba ki Nongtrei Muster Roll kila ioh jingtip na u Adviser u Bah Khroo Pariat hadien ba u la ioh ban kren markhmat bad u Myntri Rangbah ka Jylla u Conrad K Sangma.

“Haka jingiakynduh ia u Myntri Rangbah, u la kular ha u Adviser jong ngi ba un khot iakren iaki nongtrei Muster Roll haka 17 tarik Nohprah lane haka taiew ba nyngkong jong u bnai Kyllalyngkot 2026” la ong u Bah Bympherlang.

“Kumta ngi sngew dei ban burom iaka jingkular u Myntri Rangbah bad ngin ap haduh da ioh iakren bad lada ka jingiakren kam long kaba sei soh, ngin sa shim pat iaka rai” u la ong.

Nalor kane u Bah Bympherlang u la kyntu ia u Myntri Rangbah ka Jylla ban bthah iaka tnat Animal Husbandry ka Sorkar Jylla ban pyllait iaka tulop jong ki nongtrei Muster Roll kaba la sahkut mynta la hynriew bnai.