Nongpoh, Nohprah 21: Ka Kynhun ki Nongñiah Thuk thuk kaba la tip kum ka “The Ultimate Legend Bikers Association” (TULBA) kaba dei kawei na ki kynhun kiba la leh shibun ki kam Isynei sha ki Longiing kiba duk ba jynjar hapoh ka Jylla, ha ka sngi Saitjain kane ka kynhun hapoh ka jingialam u Bah OS Shulai kum u President Rangbah lem bad ki dkhot khrui ki la leit ban aiti pat sa ia kawei ka Ïing sha ka Longiing ka ba duk kaba la dep ban shna pynitynnad bha daka kynhun TULBA.

Katei ka Longiing kaba la ioh ban pdiang ïaka iing thymmai naki ksang kti jong ka Kynhun TULBA ka dei ka iing ka sem jong i kong Titi Mery Warjri ba shong ba sah haka Shnong Ñiangbyrnai Parila, kaba don haki thaiñ Umsning.

Ka Kong Titi Mery Warjri Ka dei ka lok jong u bah Shalbinus Lyngdoh Marshillong bad ki don 3 Ngut ki khun ki kti bad uwei napdeng ki khun jong ki, u dei ba don hapdeng ka jingduna ha ka bor kren bad haki por mynshwa kane ka longiing ka shong ka sah ha ka iing kaba jot bad kaba la syrdep tang ban lait na u slap bad ka lyer bad tang ban ioh thiah ïoh dem ha ki por mynmiet.

Haba ioh pdiang pat ia katei ka Ïing ha kane ka sngi, Ka Kong Titi Mery ka khlem lah ban burieh ïaki ummat kmen namar ka jingioh ia ka iing kaba itynnad ban shong ban sah bad ba ka la dei kawei naka jingangnud jong katei ka Longiing kaba la lurlong da ka jingiohi jngai ka kynhun TULBA.

Na ka liang katei ka Longkmie, ka la Pynpaw iaka jingsngewnguh ïaka kynhun Tulba ba ka la phai khmat sha ka iing jong ki bad ha kajuh kapor ka la kitbok ruh iaki ba u Blei un dang iai kyrkhu iaki ba kin dang lah ban bteng ia kine ki kam kiba khraw.

Ha shwa ban aiti ia ka iing sha katei ka Longiing, naka liang ka Kynhun TULBA ka la pynlong shwa iaka jingialang kaba long kum ka dak ka jingrakhe lypa ïaka Christmas ha kaba la ioh ban sam ruh ïaki Jaiñ Kup Syaid sha ki katto katne tylli ki Longiing jong ka Shnong Parila bad la pynkyntang ruh ia katei ka iing da u Pastor J Khonglam.

Haba kren ha katei ka jing ialang naka liang u President Rangbah ka TULBA u Bah OS Shullai, u la iathuh ba kum ka kynhun ka dap daka Jingkmen ba ki la lah ban pyndep ia ka thong ka jong ki kaba long ruh kum ka kam ban Shakri sha ka imlang ka sahlang.

U la iathuh ruh ba ki dkhot jong kane ka kynhun kim dei kiba don ba em bad bun hi ki dei kiba dang im haki jingkamai kiba rit, hynrei da ka jingiakynshew lang para dkhot daka Mynsiem kaba kylluid kaba la pynlong ia kane ka kynhun Tulba ban lah ban pyndep ia kino kino ki kam kiba ka angnud ban leh naka bynta ka imlang ka sahlang.