Nongpoh, Nohprah 22: Shwa ban rakhe ia ka lehkmen Khrismas, ka ophis u BDO Umling Block ha ryngkat ka jingiatreilang ki nongialam ka Synjuk ki Rangbah Shnong ka thain Byrnihat lem bad ki paidbah na 20 tylli ki shnong ha ka thain Byrnihat, mynta ka sngi ki la iamih paidbah na bynta ban pynkhuid ia ki lynti synkieng, ki jaboh jabain kiba don ha baroh ki shnong ka thain Byrnihat.

Ha katei ka sngi, ba la don ka jingiamih paidbah ban pynkhuid ia ki shnong ka thain Byrnihat, la wan ban iashimbynta da u Bah Sosthenes Sohtun, Myntri ka Sorkar jylla, nangta u Abhilash Baranwal, Deputy Commissioner ka Ri Bhoi, u Bah Eric Dkhar, BDO Umling Block, ki briew na ka Green Foundation Tech, ki rangbah shnong lem bad ki paidbah nongshong shnong ka Byrnihat.

Shwa ban pynlong ia katei ka jingpynkhuid shnong, nyngkong ka la don ka jingialang paidbah, ha kaba ki nongkren ha katei ka sngi kaba kynthup ia u Bah Sosthenes Sohtun lem bad kiwei, ki la ban jur ia ki paidbah halor ka jingdonkam jong ka jinglehkhuid ha ki shnong kiba don ha ka thain Byrnihat bad khamtam eh, ba ka Byrnihat ka la ioh ia kata ka nam kum kawei na ki thain ba jaboh eh ka lyer.

Namarkata, na ka liang u Bah Sosthenes Sohtun, u la kyntu ia ki paidbah nongshong shnong ka thain Byrnihat hi baroh kawei bad ia ki nongialam shnong, ba kin shim ia kata ka jingkitkhlieh na bynta ban wanrah ia ka khuid ka suba ha ki shnong ka thain Byrnihat, khnang ba baroh ki shnong kiba don ha katei ka thain ba kin long kiba khuid ba suba bad ban ioh ia kata ka lyer ring mynsiem kaba khuid, ba ki paid nongshong shnong kin long kiba koit ba khiah krad.