Nongpoh, Nohprah 22: Kum ka jingsngew burom kaba khraw halor ki kam ba bha u Senior Superintendent of Police ka Ri Bhoi, u VS. Rathore na ka bynta ban ia khun pyrshah ia kino kino ki kam sniew kiba ktah ia ka imlang ka sahlang ha ka jingialam jong u kum u khlieh duh ka tnad Pulit na Ri Bhoi, ka VDP Quinine Nongladew mynta ka sngi ka la leh burom ia u da kaba ai lyngba ka syrnot kaba long ka jingsah jingkynmmaw shuwa ba un leit shimti pat sa ia kawei ka kyrdan hadien ba u la ioh kiew kyrdan sha ka kyrdan DIG ka Eastern Range ha ka jylla.

Na ka liang ka VDP Quinine Nongladeew ha ka jingialam u Chairman u Bah Lansius Syiemlieh lem bad ki dkhot ka VDP ki la leh burom ruh mynta ka sngi hadien ka jingpynlong ia ka jingtalasi Kali ha Quinine ba ka tnad Pulit ka la ia khun pyrshah bha ia ki Kali ba pynkheiñ bad ba ha kane ka sngi la don lang u VS. Rathore kum u heh Pulit ka Ri Bhoi.

La sakhi lang ruh lyngba kane ka sngi, ki VDP ym tang ba ki la pynkup burom bad ai ia ka synot ka jingiaroh ia ki kam ba bha une u Heh Pulit ka Ri Bhoi, hynrei la sakhi ruh ba ki Riew kynthei kiba dei ki dkhot ka VDP ki la pynkhreh ruh ia ka sha ka dud sha baroh ki Pulit katba ki dang pynlong ia ka jingtalasi ia ki Kali ba pynkheiñ ain.

Kumba la pynpaw da u Chairman ka VDP Quinine Nongladew u Bah Lansius Syiemlieh, u la ong ba ka jingkhie im ka VDP ha  katei ka shnong ruh ka dei ha ka jingwan u VS Rathore kum u Heh Pulit ka Ri Bhoi bad kumba la lap u dei u heh Pulit ophisar uba kloi ban ia trei lang na ka bynta ka bha ka miat bad ban wan rah ruh ia ka shongsuk shongsain ki paidbah ha kane ka District bad ruh ha ka jinglong jong u kum u heh pulit ka Ri Bhoi la lah ruh ban pynim biang da ki spah tylli ki VDP ha Ri Bhoi ban ia trei ryngkat bad ka tnad Pulit na ka bynta ban ia khun pyrshah ia ki kam sniew bad ban wan rah ia ka shongsuk shongsain ki paidbah.