Nongpoh, K’lyngkot 13: Ban ai jinghikai kyrpang ia ki paidbah nongshong shnong kiba shong ha ka thain Umtru Hydro Electric Power Station ha ka thain Byrnihat lyngba ka Projek Dam Rehavilitation and Improvement Project, ka tnad MePDCL mynta ka sngi ka la pynlong da ka prokram ai jinghikai kyrpang ia ki paidbah na ka bynta ban iada ia lade bad ruh ban sumar ia katei ka jaka pynmih bording ilektrik kaba dei kawei na jaka pynmih bording ilektrik ka sorkar ban ai bording sha ki paidbah nongshong shnong ka thain Byrnihat.
Ha kane ka prokram ai jinghikai la wan ban shim bynta da u Bah Metbah Lyngdoh u myntri ba de peit ia ka tnad bording haka jylla kum u kongsan bad la sakhi lang ruh da ka jingdon lang u Bah Sosthenes Sohtun u myntri ba de peit ia ka tnad C&RD kum u symbut kongsan.
La sakhi lang ruh ha kane ka sngi da ka jingdon lang u Deputy Commissioner ka Ri Bhoi u Abhilash Baranwal bad kiwei kiwei ki heh ophsiar ka tnad MePDCL lem bad ki paidbah nongshong shnong.
La sdang ruh ia kane ka prokram ai jinghikai da ka jingai jinghikai kyrpang ia ki nongleit jngohkai pyrthei bad ki paidbah nongshong shnong kiba kiba ju leit sha katei ka wah Umtru ba ki dei ban long kiba phikir bha ha ka por ba pynlait um khamtam ha ka por slap khnang ba kin nym mih kino kino ki jingjia ba sngewsih. Ha kajuh ka por la ai jinghikai ruh ia ki nongwan jngohkai pyrthei bad ia ki paidbah ba ki dei ban sumar khuid ia katei ka wah bad ruh ia katei ka jaka pynmih bording ilektrik ba kim dei ban pynjot ia ki jingdon jingem ha katei ka jaka.
Ki bor pyniaid kane ka jingai jinghikai ki la pynlong ruh ia ka jingthung dien ha katei ka jaka ba la lamkhmat da u Bah Metbah Lyngdoh bad u Bah Sosthenes Sohtun kum ki kongsan jong kane ka sngi.
Shuh shuh, lyngba kane ka sngi la pynlong ruh ia ka jingiaid kjat ki khynnah skul kiba la rah la ki placard ryngkat ki jingthoh kiba kyrpad ban sumar khuid ia kane ka dam kaba dei ka jaka pynmih bording ilektrik bad bud sa ka jingjurip ia ka jinglong jingman katei ka dam da kitei ki myntri sorkar ka jylla Meghalaya.