Nongpoh, K’lyngkot 30: U Bah Sosthenes Sohtun, MLA/MDC Jirang bad uba dei ruh u Myntri ha ka sorkar jylla, mynta ka sngi, u la leit ban aiti ia ka Ambulance sha ka Synjuk ki Seng Samla Shnong (SSSS) Ri Bhoi Sepngi bad ha katei hi kajuh ka sngi, u la ïoh ban aiti ia ki tin sopiing sha kito ki longiing kiba donkam jingiarap, sha ki Balang ba kin ïoh pyndonkam ha ki Iingmane lem bad sha ki shnong ba kin pyndonkam ha ka ban tap ia ki Iing Dorbar.

Ia katei ka jingialang ban pyllait paidbah ia ka Ambulance bad sam tin sha ki paidbah la pynlong ha phyllaw ka ophis ka Jirang C&RD Block, ha kaba nalor ka jingdon u Bah Sosthenes Sohtun, la sakhi ruh da ka jingdon u Dr. P. Hajong, BDO ka Jirang C&RD Block, ki nongialam Shnong Ri Bhoi Sepngi lem bad shibun ki riew rangbah jong katei ka thaiñ.

Lyngba katei ka sngi, ki la don kumba 119 tam ki longiing kiba la ïoh pdiang ia kitei ki tin sopiing, ha kaba na ka liang u MLA u kham ai shibun ia kito kiba kham duna ka ïoh ka kot bad khamtam eh na bynta jong kito ki longiing kiba ngat ha ka apot pluh iing, ia kitei ki tin sopiing kiba u la aiti sha kitei ki longiing, Iingmane bad Iing Dorbar, u la thied lyngba ka skim Special Rural Work Program (SRWP).

Katba ia katei ka kali kit nongpang, kaba u la aiti sha ka SSSS Ri Bhoi Sepngi, ka dei kabaa thied lyngba ka Chief Minister Special Development Scheme (CMSDS).