Shillong, Rymphang 02: Ka Deputy Commissioner ka South West Garo Hills ka Anendya Raajsshre mynta ka sngi nyngkong jong ka taiew ka la kyrpad jur ia ki paidbah ban pynneh ia ka shongsuk shongsain, ban ai ka jingiatrei lang bad ka bor synshar District bad ruh ban nym shim ia ka ain ha ka kti lada don kino ki jingjia hapoh ka District.
Haba kren mynta ka sngi ha ka jingialang ba la pynlong kyrpang ban wan rah ia ka shongsuk ka shongsain (Peach meeting) ha Ampati, ka Raajsshre kum Deputy Commissioner ka la ong ba kane ka District ka dei ka District kaba la ju don hapdeng ka shongsuk shongsain wat la ka dei ka District kaba don shibun ki jaid byrniew bad ki niam.
Na ka liang ki bor synshar District ki la pynthikna ruh ia ki nongwan shim bynta ha kane ka jingialang ba kin shim ia ka rain a ka bynta ban pynneh ia ka shongsuk ka shongsain hapdeng ka West Garoi Hills District bad ka South Salmara District jong ka jylla Assam bad kyrpad ruh ia ki nongkhaïi bad ia ki paidbah nongshong shnong ban pynneh ia ka shongsuk ka shongain bad ruh ban nym pynmih kino kino ki kynrum ki kynram kiba ktah ia ka shongsuk ka shongsain.
Na ka liang u Superintendent of Police ka South West Garoi Hills u Vikash Varma haba kren hakane ka sngi u la kyrpad ia ki paidbah ban pynneh ia ka shongsuk ka shongsain, ban pyntip lada don kino kino ki jingioh jingtip lyngba ka Social Media lane ban pyntip ia kino kino ki jingjia sha ki Police Station kiba don ha katei ka thain bad ym ban ialeh pyrshah ne ban shim ia ka ain ha ka kti.
Kane ka dei ka jingialang kaba la pynlong mynta ka sngi da ka bor synshar District ka South West Garo Hills ha Ampati ka dei kaj ingthmu ban wan rah ia ka shongsuk ka shongsain (Peace Meeting) hapoh katei ka District.
La pyntip ruh ba la pynlong ia kane ka jingialang ka dei hadien ba la mih ki kynrum ki kynram kiba la ktah ia ka jingdie ia ki kwai da ki nongrep bad ki nongkhaïi, kaba dei ruh hadien ba la mih ka jingsngewiapher jaid bynriew ha Garo Hills.
Ha kane ka jingialang la shim bynta naduh ki Nokma, ki nongialam na ki jaid niam bapher bapher, ki nognialam Seng bhalang, ki riew rangbah, ki nongshong iew, ki nongrep kwai bad ki nongkhaïi.
