Shillong, Rymphang 02: Ka Sorkar Jylla Meghalaya ka la long kaba la pynkhreh ban peitngor bad ban iakhun ia kano kano ka jingma na ka jingsaphriang jong ka Nipah Virus bad haduh mynta kam pat don kano kano ka khubor halor ka jingsaphriang jong kane ka jingpang hapoh ka jylla, ong u Myntri ka Tnad ka Koit ka Khiah u Wailadmiki Shylla.
Haba kren bad ki Nongthoh Khubor, u Bah Wailadmiki Shylla, u la ong ba halor ka jingsngewkhia kaba jur halor ka jingsaphriang jong kane ka jingpang Nipah ha West Bengal, ha kaba u la pyntip ba la bthah ia ki bor ka tnad ka Koit jong ka jylla ban peitngor halor kane ka jingpang, hynrei haduh mynta kam pat don eiei han kane ka jylla.
“Ngim kwah ba ki paidbah kin khih khuslai halor kane ka jingpang, namar kam pat don kaiphod eiei hapoh ka jylla Meghalaya, hynrei ki bor ka tnad ka Koit ka Khiah ki la long kiba pynkhreh pat ban iakhun lada don eiei”, ong u Bah Shylla.
Ha kawei pat ka liang, ha kaba ia dei bad ka jingpynkhreh ia ka National Games, u Bah Wailadmiki Shylla kum u Myntri ka Tnad ialehkai sport, u la ong, ba ka jingpynkhreh ka la iaid shaid shaid bad ha kaba ia dei pat bad ka jinglut jingsep, kum u Myntri u la pyntip ba na ka liang ka sorkar Meghalaya ka la dep ban pan jingiarap halor ka song pisa na ka sorkar pdeng, da kaba bynrap ba hoid ngi khmieh lynti ba ka sorkar pdeng kan ai jingiarap kham bun, hynrei kum ka jylla hi kaba la pan ban pdiang ban pynlong ia kane ka lympung ngi la long kiba la pynkhreh.
