Nongpoh, Rymphang 04: Ka Arhi Hospital kaba dei ka Multi Super Speciality ka la rai ban ai ia ka jingsumar ei na ka bynta kito kiba don jingpang khyllai (Kidney), kiba don maw ha khyllai (Stone Kidney) lem bad kiwei kiwei ki jaid jingpang ha Ri Bhoi Pharmacy kaba don ha sor Nongpoh.
Kane ka jingai jingsumar da u Doctor ba la pyntbit (Urologist) kan long ha ka 11 tarik u Rymphang 2026 naduh ka por 1 baje noh phai sngi haduh 5 baje janmiet.
Na ka liang u Dr. Debajit Bashya, uba dei u Urologist ka Arhi Hospital u la khot la wer ia baroh ki paidbah nongshong shnong ka Ri Bhoi, kito kiba don jingpang ha ki khyllai, kiba don maw bad kiba shem jingeh ha ka jingleit pynjhih kin wan ban shim kabu ha kane ka jingai jingsumar ei na ka liang ka Arhi Hospital.
Shuh shuh, u la khot la wer ba ha kane ka jingsumar ei kan nym don kano kano ka jingshim pisa bad kane ka dei shi bynta ka jingiarap kyrpang na ka liang ka Arhi Hospital na ka bynta kito ki paidbah kiba mad ia kitei ki jaid jingpang.
