Shillong, Rymphang 06: U Sanjay Das, uba dei u General Secretary ka Meghalaya Pradesh Congress Committee (MPCC), u la ong ba ka Party ka dawa ia u Conrad K. Sangma, Myntri Rangbah ka sorkar jylla, ba u dei ban hiar noh na ka shuki kum u Myntri ba dei peit ia ka tnat ki kam tih mar poh khyndew, nalorkata u la ong ba ka Congress ka dawa ban don da ka jingtohkit kaba kylluid halor ka jingjia ba bthei ka par tih Dewiong ha Thangsko, East Jaintia Hills bad kaba la shim ia ka jingim jong 18 ngut ki mynsiem briew.

“Kum ka Party khlem kano kano ka jingartatien, hynrei ngi dawa ba kiba don ha ka bor synshar lem bad ki bor synshar Distrik ba ki dei ban shim ia ka jingkitkhlieh halor katei ka jingjia ba sngewsih, kumta ngi dawa ia u Conrad Sangma, uba bat ia ka shuki kum u Myntri ki kam tih mar poh khyndew ba u dei ban hiar shuki noh mardor bad ban ailad ia ka jingtohkit kaba kylluid” ong u Sanjay Das.

Shuh shuh, u la ong ba kum ka Party ka dawa ban thung da ka kynhun tohkit ba laitluid jong ka iingbishar lane ba ka iingbishar ba kan tohkit bad buddieng halor ka jingdon jong ki kam tih mar poh khyndew ha East Jaintia Hills bad ha kylleng ki bynta ha Meghalaya.

Nalorkata, kum ka Party ngi dawa ruh ba dei ban leh da kaba tyngeh ia ki ophisar sorkar, namar ka jingbym leh eiei ne ym shimkhia ha ka ban tehlakam ia ki kam tik marpoh khyndew ba beain ha katei ka thain ba la jia katei ka jingjia ba sngewsih.

Namarkata, na ka liang ka Party ka shim ba katei ka jingjia ba sngewsih bad kaba wanrah ia ka jingkhlad jong 18 ngut ki briew, ba ka dei ka jingiap ba ym don kiba shimkhia, kata naduh ka rukom pyniaid bad ka jingsngapjar ne bym leh eiei da ki bor pyniaid Distrik, u la bynrap.