Shillong, Rymphang 07: Kat haduh mynta ka sngi, ka jingdon kiba iap na ka jingbthei ka par Dewiong bad kaba la jia ha ka 5 tarik ha Mynsngat ha ki thain Thangsko, East Jaintia Hills, ka jingdon jong kiba iap ka la kot sha ka 27 ngut, kata katkum ka tyllong khubor kaba la pyllait da u  u Vikash Kumar, Superintendent of Police ka East Jaintia.

Na kitei ki 27 kiba la iap ha katei ka jingbthei ha paw Dewiong, 17 ngut ki Pulit ki la lah ban pynithuh dur khmat, ia kaba la dep ban aiti noh ia ki sha kiba haiing hasem, kata hadien ba la dep ban pyndep bad leh ia ki jingdonkam baroh.

Haba iadei bad katei ka jingjia ba bthei ka par Dewiong, ki Pulit ki la ujor da ka Suo-Motu FIR ha Khliehriat Police Station katkum ka Case No. 14/2026 U/S 105/118(2)/3(5) BNS r/w Sections 21/21(1) of the Mines and Minerals (Development and Regulation) Act and Section 3 of the Explosive Substances Act.

Kumba ka long haduh mynta bad halor katei ka jingjia, ki Pulit ki la ioh ban kem ia arngut ki briew, kiba la shah kynnoh donkti ha katei ka kam, ia kaba la tip kum u Forme Chyrmang 36 snem ka rta uba na ka shnong Jalaphet Pordung, East Jaintia Hills bad u Shamehi War 42 snem ka rta na ka shnong Sutnga Pohwailong, East Jaintia Hills, ha kaba la rah ia ki sha Iingbishar bad kin don 3 sngi hapoh ka jingtohkit ki Pulit.

Ka jingpyrshang ban ithuh bad ban kem ia kiwei pat kiba la shah kynnoh donkti lang ha katei ka kam kan dang iaid shakhmat, ha kaba na ka liang ki Pulit ki dang iai pynlong ia ka jingtohkit bad jingwad ha ryngkat ka jingpyndep katkum ki kyndon kan dang iaid shakhmat.