Nongpoh, Rymphang 19: Haba kren sha ki lad pathaikhubor mynta ka janmiet ha Nongpoh, u Bah Luistar Lyngdoh, President ka FKJGP NKHD, u la ong ba ka Seng ka khot bad ka wer ia ki dkhot ka seng kumjuh ruh ia ki paidbah, ba kin wan iasnohktilang bad ka Seng ha ka jingiaid paidbah ba jai jai ne ka Peace Rally, ba ka Seng kan pynlong lashai ka 20 tarik u Rymphang ha Nongpoh.
U Bah Luistar Lyngdoh, u la ong ruh ba katei ka Peace Rally jong ka FKJGP kan sdang ha ka por 1 baje noh phaisngi, ha kaba yn sdang na ophis u DTO Nongpoh bad yn pynkut pat ha Madan Pahamsyiem, ia kaba yn sa don ruh ka jingialang ba lyngkot, ia kaba yn sa don ki nongkren na ki nongialam ka seng lem bad ki nongialam na kiwei pat ki kynhun sengbhalang.
Ka jingthmu jong katei ka Peace Rally, ka long ban dawa na ka sorkar jylla, ba ka dei ban shimkhia noh mardor ha ka ban pynbeit ia u pud u sam jong ka Meghalaya, namar ha jinglap bad jingiohi ka seng, ka long ba ka sorkar kat haduh mynta kam shym la shimkhia ha ka ban pynbeit ia u pud u sam, kata ym tang ha ki bynta jong ki shnong khappud kiba don ha Ri Bhoi, hynrei ha kiwei kiwei ruh ki jaka khappud jong ka Meghalaya, u la bynrap.
