Shillong, Rymphang 23: Kum u nongmihkhmat na ka Mawhati Constituency u Bah Charles Marngar mynta ka sngi ha ka Dorbar mang tyngka kaba de halor ka Governor’s Address, u la wan rah shibun ki mat kiba ïa dei na ka bynta ka jingeh ki paidbah ha Mawhati Constituency.

Ha shwa ban wan rah ïa kiba bun ki mat, u Bah Charles Marngar u la ïaroh ruh ïa ka sorkar MDA ha ka jingïalam u Conrad K. Sangma kum u Myntri Rangbah bad ruh ïa u Bah Prestone Tynsong ku u symbut myntri ka sorkar jylla ba peit ruh ïa ka tnad PWD, da kaba ong ïa kaba dei ban ïaroh ngi hap ban ïaroh bad ïakaba ym de ban ïaroh ngim dei ban ïaroh.  U la ong ruh ba ka sorkar jylla ka la pyrshang ban leh bha ha baroh ki liang ban wan rah ïa ki kam pynroi sha ki paidbah.

Kawei ruh kaba u la ïaroh ba ka jingmut ka MDA kam dei tang ka Meghalaya Democratic Alliance bad ka mut ruh Master of Developments with Action, da kaba ai burom halor ki kam pynroi ba wan rah da kane ka sorkar.

U la pynpaw ruh ha khmat ka Dorbar mang tyngka ba ka Mawhati Constituency ka dei ka Constituency kaba dang sahdien ha baroh ki liang bad ka donkam ïa bun ki kam pynroi ba ka sorkar jylla ka hap ban phai khmat kyrpang.

Kit mat ba la wan rah da u Bah Charles Marngar ki kynthup ïa ki surok, ka umbam ka umdih, ka koit ka khiah, ka rep ka riang, ka jingmyntoi ba ioh na ka CM’s Assure bad kiwei kiwei ki kam pynroi kiba donkam ha Mawhati Constituency bad kynthup ruh ha Ri Bhoi District.

Haba kren kyrpang halor ka surok, u Bah Charles Marngar u la ïathuh ba 10 km ka surok PMGSY na Mawlasnai sha Kdohhati la pyndep, 16 km na Umlaper sha Lympung la pyndep, 8 km na Mawlaho sha Pamlatar ka la jan dep, 16 km na Rtiang sha Mawlyngngai ka la ïaid shakhmat ka kam bad kynthup kaba u angnud ban sdang noh ïa ka surok ba 40 km na Sohnidan sha Umsiang kaba long ka surok kaba donkam bha na ka bynta ki paidbah ka Constituency, ka Ri Bhoi bad ka jylla hi baroh kawei.