Mizoram, Jylliew 23: Ka Myntri ba dei khmieh ia ka tnad Mizoram State Disaster Management Authority lane DM&R jong ka jylla Mizoram, u K. Sapdanga u la khot ia ka jingialang kaba kyrpang bad ki ophisar ba dei khmih ia ka Inter-Ministerial Team jong ka sorkar pdeng bad ruh ki ophisar na ki tnad treikam bapher bapger jong kane ka jylla, ban ia wad jingtip bad ruh ban lum ia ka kaiphod kaba tikna halor ki jingjulor bad ki jingjia ba sngewsih kynthup ki jingduhnong ba kum ka jylla ka la mad ha ka jingwan lynshop ka eriong Remal lane ka Remal Cyclone.
Ha kane ka jingialang kaba kyrpang, na ka liang u Chief Secretary Dr. Renu Sharma u la pdiang burom ia baroh ki ophisar kynthup ia u Myntri u K. Sapdanga, ha kaba la ia kren sani bha halor ki jingjia jingjulor na kane ka eriong Remal kynthup ia ki jingjulor ki surok, ki jingjulor jong ki tanki shalan um, ka bording ilektrik bad kiwei kiwei ki jingjulor khamtam ha ba ia dei bad ki jingjulor jong ki jingtei project kiba thymmai ha ka jylla Mizoram.
La ia kren ruh, ba ka tnad ba dei khmih ia ka kam pohing, ha kaba u Myntri Rangbah ka jylla u Lalduhoma u la dep ruh ban phah ia ka kaiphod bad ka dorkhas halor jinglutksan ba al mad da ka jylla Miizoram sha u myntri ka sorkar pdeng ba dei peit iaka kam pohiing u Amit Shah, da kaba kyrpad ruh ban ai jingiarap lyngba ka mang tyngka. La pyntip ruh, ba ha kane ka jingwan lynshop ka eriong Remal, kumba 34 ngut ki nongshong shnong ki la khlad noh bad ka jingjulor kaba shyrkhei ka la wan jia ha kane ka jylla, u Sapdanga u la wanrah ia ka kaiphod ba ka jinglutksan ba la mad da ka jylla Mizoram ka la kot haduh ₹237.6 klur tyngka.
La wan ban ia shimbynta ruh ha kane ka jingialang da ki ophisar ba kynthup na Inter-Ministerial Team, ba la lamkhmat da u Abhijit Sinha, Joint Secretary, ka tnad Ministry of Home Affairs lem bad u Jinta Das na ka tnad Agriculture, u Mahesh Kumar na ka Ministry of Finance, u Rajveer Singh na ka Ministry of Jal Shakti, u Adelbert Susngi na ka tnad Ministry of Road Transport bad u Moti Ram na ka Rural Development lem bad kiwei kiwei.
Hadien kane ka jingialang, u Myntri K Sapdanga lem bad ki ophisar ki la leit jurip ruh pat sha Melthum, Hlimen, Kulikawn, bad ITI ban lum ia ka kaiphod halor ki jingjulor ba la mad kumjuh ruh la jurip ia ka jingkieng ba dang shna ha Sihhmui, la jurip ruh ia ki jingthung ba la julor ha Sairang Dinthar ba la jia na ka jingshlei um lyngba ka wah Tlawng.
