New Delhi, Lber 18: Ka jingshah pynngop jong ki samla kynthei Khasi kiba ju shah kular ban iohkam sha nongbah Delhi ka la nang jur bad bun ki la nang ngat ha ki jingshah pynbor ban trei pynban ha ki kam bym long, kane ka la paw biang hadien ba ki nongialam ka Khasi Student’s Union, Delhi unit ka la ioh ban pynlait im ia arngut ki samla kynthei kiba la shah ialam bakla sha Nongbah Delhi.

Ka kyrwoh ba la phah da ka KSU, Delhi Unit ka la pyntip ba ha ka 17 tarik Lber, ka seng lem bad ka jingiatreilang bad ki bor Special Police Unit for North East Region (SPUNER) ki la lah ban pynlait ia ki arngut ki khynnah kynthei kiba la shah riam bad shah pynbiej ban pyniohkam sha Delhi hynrei ki la ngat pat ha ki jingshah pynbor ban trei ha kawei ka spa ne ban khaii met.

Ka kyrwoh ka la iathuh, ba kine ki arngut ki samla kiba na Jaintia Hills kiba don kumba 18 bad 25 snem ki la shah ialam ha kawei ka briew na ka jylla Meghalaya kaba trei ha Delhi, da kaba pynngop ban pyniohkam ia ki (Domestic help) ne kam kum ki nongtrei hapoh iing bad la ialam ia kine ki arngut ki samla kynthei khlem ka jingtip ne jingbit na ki bahaiing hasem.

Shuh shuh ruh, ka kyrwoh ka iathuh, ba ynda poi sha Delhi kine ki samla ki la shah ialam pynban sha Haryana ban pyntrei ha kawei ka spa bad hangne la pynbor ia ki ban die met bad da ka jingsheptieng kine ki samla ki la phone sha la ki bahaiing bad kumta hi marmar ki bahaiing ki la phone sha ki nongialam ka KSU Delhi Unit ban pan jingiarap.

Ka kyrwoh ka iathuh ruh, ba mar ia ioh jingtip, ka KSU ha ryngkat ka jingiatreilang bad ka SPUNER, ki la pyrshang ban tohkit bad da ka jingtreishitom ki la lah ban ioh pynlait luid ia kine ki samla na kawei ka jaka ha Haryana.

Na ka liang ka KSU Delhi Unit ka la ai khublei ia baroh ki dkhot kiba la iatreishitom ban iada ia ka jingim briew, kumjuh ia ki pulit ka SPUNER, ki Nongtrei jong ka Meghalaya House bad kiwei kiwei kumjuh ia u Ma Kyrmen Shylla u ba la pynbiang ia ka bai flight ticket ban pynpoi ia kine ki arngut sha la ka jylla.

Shuh shuh ruh, na ka liang ka KSU ka la kyntu ia baroh ki kmie ki kpa bad ki samla ban long kiba phikir bad kiba sumar bha na ki jingpynshoi ki nongthok kiba kular kam ban ioh kam. Ka KSU ka ieng skhem beit ban iada ia ka bit ka biang jong ka jaitbynriew Khasi ha Delhi-NCR.”