Shillong, Lber 20: U Symbut Myntri Rangbah ka jylla ba dei peit ia ka tnat District Council Affairs (DCA) u Bah Prestone Tynsong  mynta ka sngi u la ther kylla ia ka party Congress da kaba ong, “ “Hato ka Congress party khamtam kaba peit ba khmih sha Garo Hills, kam ïohi mo iaka jingangnud ki paibah ha Rilum Garo”.

Ïa kane u Bah Prestone u la kynthoh halor ka jingdawa ka Congress baka Sorkar kadei ban pynlong beit iaka ilekshon MDC sha Garo Hills Autonomous District Council (GHADC) naka bynta 27 tylli ki constituency lait noh ki 2 tylli ki constituency kata ka Shyamnagar bad Balachanda constituency.

Haba kren shaki lad pathai khubor u Bah Prestone u la ong ba kane ka jingdawa ka Meghalaya Pradesh Congress Committee (MPCC) ka dei ka bym shongnia bad ka dei ka jingdawa kana khlem da don ka jingkitkhlieh.

U Bah Prestone u la ong baka Sorkar ka shimkhia haba iadei bad ka jingangnud ki paidbah, ka jingdawa bad ka jingsngew jong ki paidbah bad dei namar kane daw ka Sorkar ka hap ban shim iaka rai ban pynsangeh shwa iaka ilekshon MD ha GHADC.

“Hato ka MPCC khamtam kaba peit ba khmih sha Garo Hills, kam ïohi mo iaka jingangnud ki paibah, kata kadei kaba nga kwah ban kylli” la ong u Bah Prestone.

U Symbut Myntri Rangbah, u la ong ba um sngewthuh iaka jingmut haba iadei bad ka jingdawa ka Congress. “Hato ka biang seh ban nym pynlong ilekshon haki 2 tylli ki constituency. Kane ka jingdawa kadei ka jingdawa kaba khlem da don ka jingkitkhlieh” ula buh jingkylli.

Shuh shuh, u la bynrap ruh ba kane ka jingdawa  ka Congress ka dei tang ka jingdawa ban ïoh woh nia bad woh daw, iaki sienjam bad iaka rai ba la shim da ka sorkar.