Nongpoh, Lber 20: Kawei na ka Gas Agency ha Ri Bhoi, ka Wankhar Gas Agency ba la pyniaid da u Bah P.M Wankhar bad ka Kong S. Marbaniang kiba ju pynbiang ia ka tyndong gas shed jingshed na Umling shaduh sha Umset ha Ri Bhoi mynta ka sngi ki la pynpaw ia ka jingeh kaba khraw ban pynbiang ia ki tyndong gas shed jingshed  sha ki paidbah na ka daw ka jingduna stock ha ka agency jongki.

Ki la pynpaw ruh ba ki da hap ban mad ia ka jingeh kaba khraw ban ai ia ka jubab sha ki paidbah kiba donkam tyndong gas shed jingshed, kaba dei na ka daw ka jingbym biang bad bym poi ki tyndong gas ha ka stock jong ki kaba don ha Byrnihat.

Ka Kong S. Marbaniang kum kawei na kaba pyniaid ia katei ka Gas Agency ka la pynpaw ia ka jingsngewdiaw bad ka jingsngew synei ia ki paidbah kiba ju shim ia ki tyndong gas shed jingshed na katei ka Agency bad kiba la shaniah mynta la bun phew snem, ha kaba bun ki paidbah ki la wad ban hylla bad phone halor ka jingbym ioh ia ka Gas shed jingshed khmatam kito kiba pyndonkam shed jingshed tang da ka Gas.

Ka Kong Marbaniang da ka jingsngewkhia halor kane ka jingeh ki paidbah na ka daw ka jingkyrduh ka gas shed jingshed ka la kyrpad jur ia ka sorkar ban shim khia halor kane ka kam ban weng ia kane ka jingeh ki paidbah, namar lada ym lah ban pynbiang ia ki gas shed jingshed kum ka Agency ruh ka kynduh jingeh ban pynsngewthuh sha ki paidbah,

Shuh shuh, ka la kyrpad ruh ia ki paidbah ba ki dei ban kynmaw na ka bynta ka booking iaki Gas tang mar ia kut ka por, namar mynshuwa ka por na ka bynta ban booking ka dei 20 sngi bad mynta pat la pynjlan shaduh ka 25 sngi na ka bynta ka Booking ia ki gas shed jingshed, ka la bynrap.