Shillong, Lber 20: Ka Khasi Student Union (KSU) mynta ka sngi kala bthah iala ki dkhot ban sngap pyrman bad ban leit khang iaki Ophis lane ki program Sorkar, iaki skul bad ia kino kino ki jait program lada ka don ka jingpynbor ban hap ban rwai iaka jingrwai ‘Vande Mataram’.

Ia kane la pynbna da u General Secretary ka KSU u Samla Donald V Thabah haka jingialang kynmaw iaka jingdap 48 snem ka KSU ha Shillong.

Kane ka jingbthah ka KSU kadei kum shi bynta ban pyrshah iaka jingbthah ka Sorkar India ba baroh ki dei ban rwai shwa iaka jingrwai Vande Mataram hashuwa ban pynlong ka kino kino ki Program.

U Samla Donald ula ong ba haka jingrwai Vande Mataram ki don tang artylli ki dkhot (Paragraph) kiba kren shaphang ka ri India hynrei baroh ka jingrwai ka kren shaphang ka jinglong jingngeit Hindu.

“Kane ka jingthmu shaba lyndet jong ka Sorkar India ban pynkylla riewngeit Hindu ia baroh ki nong shong shnong ka Ri India, ban ban pynkylla ia baroh kum ki nong shong shnong rithor ba ngin hap bud noh iaka riti dustur jong ki nong rithor bad ngi hap klet noh iaka ka kong ka riti dustur” la ong u Samla Donald.

U samla Donald ula iathuh ruh ba haki snem 1950, kala don ka hukum bala pynmih daka Sorkar India ban pynlong iaka ktien Hindi kum ka ktien kaba kongsan (Compulsory).

“Ha kito ki snem ki nongialam ka jaidbynriew jong ki, kila ieng pyrshah iaka ktien Hindi bad kane ka jingieng pyrshah ki nongialam ka jaidbynriew, haduh mynta ka ktien ka thylliej bad ka riti dustur jong ka Jylla ka dang iai neh” ula ong.