Shillong, Lber 20: Ha ka jingkynmaw burom mynta ka sngi ia ka jingiaid lynti ba 48 snem ka Khasi Students Union (KSU) naduh ba la suit la shor kum ka seng ban shakri na ka bynta ka jaid bynriew, u President ba rangbah ka KSU u Samla Lambokstarwell Marngar u la kren shai ba ka KSU kan nym kynrandien  da lei lei bad kan dang bteng ban ieng skhem ban shakri ia la ka jaid bynriew wat hapdeng shibun ki jingtynjuh bad ki jingeh kumba la ka kynduh ha ki 48 tylli ki snem ba la leit noh.

U la ong ruh wat lada don shibun ki jingshah bein shah khoh, ki jingshah kynnoh pyrshah ia ka seng, hynrei ka seng kan nym sngap satia, namr ka jingsuid jingshor ia ka seng KSU ka long beit ban iada ia la ka jaid bynriew bad ban peit ia ki jingeh ba ka jaid bynriew ka ia kynduh na ka jingshah thombor ha ki mynder.

U la pynkynmaw ruh da kaba ong, ha ka jingshakri hapoh ka seng bun ki dkhot ka seng ym tang ba ki la khrew ka met ka phat ba ki shah bom shah shoh, shah set byndi ba ki ia khun na ka bynta ka jaid byrniew, hynrei la bun ruh ki dkhot kiba la duh ia la ka jingim ha u kuli bad ruh ha ki kti jong kita ki mynder kiba pyrshang ban hiar thma pyrshah ia ka jaid bynriew ka bri u Hynniewtrep.

U la ong ruh ba kum ka seng ka la iakhun bad kren halor shibun ki mat ki jura kiba ia dei na ka bynta ban iada ia ka hok ka jaid bynriew sha ka sorkar, hynrei kumba long haduh mynta bun kim pat shy la urlong bad haba mih ki dkhot ka seng ban ia khun ki shah kem bad shah set pathok pynban tang na ka daw ba ia iakhun bad ialeh ia la ka hok ka jaid bynriew.

U la pynpaw ruh ia ka jingsngewkhia ba ha ka jinshisha ka pathok ne ka byndi ka dei ban set na ka bynta kito kiba leh ia ki kam sniew, hynrei haba ia khun ia ka hok ka jaid bynriew ki set pynban ia ki dkhot ka seng ha katei ka jaka kiba leh kam sniew.

Namarkata, kum u nongialam ba rangbah ka seng u Sama Marngar u la ong ba kane ka jingdap 48 snem ka seng kam dei ka jingkut bad ka seng kan dang bteng ban ia khun ia kino kino ki mat ki jura kiba donkam ban iada ia ka jaid bynriew bad wat lada ka seng ka hap ban mat shibun ki jingtynjuh hynrei kan ieng skhem haka nongrim na ka bynta ban iada ia la ka jaid bynriew na ka jinghiar thma ki mynder, u la bynrap.