Nongpoh, Lber 21: Ka lympung ïalehkai cricket kaba nyngkong eh ha Ribhoi jong ka Central Ribhoi Cricket Association (CRCA) kaba la ai kyrteng ka 1st Central Ribhoi Cricket League (Deuce Ball) ka la ioh ban sdang mynta ka sngi daka Jingiakhun kaba nyngkong hapdeng ka Best Of The Best Umïam Cricket Club pyrshah ïaka Benris Cricket Club kaba la long ha Madan ïalehkai Umsning Sports & Cultural Playground, Umsning.

Īa katei ka lympung la wan ban plie da u President ka Meghalaya Cricket Association u James PK Sangma kum u kongsan haka jingiadonlang u President ka RBYF u Bah Bipul Thankhiew kum u Symbud Kongsan, Chantanya Awasthi, IAS, SDO Ka Patharkhmah, lem bad ki Nongialam ka CRCA U Bah Donkupar Sumer President, Bah Rocky Marweiñ Vice President lem bad kiwei kiwei ki riew Rangbah ka thaiñ.

Haba phai sha katei ka Jingialehkai, ka Best of The Best Umïam Cricket Club ka la jop ïaka jingkyntieng pisa bad ka jied ban bowl nyngkong bad ailad ïaka Benris Cricket Club ban tied nyngkong bad ka la ioh ban kamai 128 run haki 20 over bad duh noh hap 9 wickets bad ka Umïam ka hap ban tied 129 run ban ioh iaka nam jop.

Haba beh pat ïa katei ka 129 ruh ba la buh Target daka Benris Cricket Club, Ka Best Of The Best Umïam Cricket Club ka la lah ban beh ïa katei ka runs tang hapoh 15 over 4 boll ka la ioh ban tieh haduh 133 run bad duh tang 4 wickets bad ka la pynliem syndon iaka Benris CC da 6 wickets.

Ha katei kajuh ka sngi, u President ka MCA u James PK Sangma lem bad ki Nongialam ka Association ki la leit ban jurip ïaka jaka jong ka Central Ribhoi Cricket Association kaba don haka Shnong Umsning Ningthymmai kaba la ai sngewbha daka Shnong naka bynta ban tei ïaka madan ïalehkai kaba kham paka.