Nongpoh, Lber 23:  Kum shi bynta ban don lang kata ka jingkitkhlieh na ka bynta ki paradoh ki parasnam kiba la shah ktah jur ha na ka jinglynshop ka eriiong, ka Khasi Students Union (KSU) Nongpoh Circle ka la leit ban maramot ia ki 2 tylli ki ïing kiba la shah ktah jur ha ka shnong Umsawongkharai ba hap ha Umsning C&D Block ha Ri Bhoi.

Kine ki ar tylli ki ïing kiba la shah ktah jur na ka jingpynjot ka eriong dang shen ki kynthup ia ka longïing jong ka Kong Shidalin Nongrum bad ka ïing jong u Bah Joel Nongrum, kiba dei ki nongshong shnong ka shnong Umsawnongkharai.

Ha kaba maramot ia kine ki 2 tylli ki ïing, ki nongialam ka KSU Nongpoh Circle ki la pynlut por 2 sngi ban maramot bad mynta ka sngi hadien ba la pyndep ban maramot ki la aiti biang ia kitei ki longïing ba shah ktah ban shong ban sah. Ha kane ka sngi ba kitei ki longing ki la ioh biang ban shong ban sah la sakhi lang da ka jingdon lang u President ka KSU Nongpoh Circle, u Bah John Lyngdoh lem bad ki dkhot ka seng ha ryngkat ka jingdon lang u Secretary Shnong u Bah Clephas Syngkli bad kiwei kiwei ki nongialam Shnong.

Haba kren ha kren ha kane ka sngi, u Bah John Lyngdoh kum u nongialam ka seng u la pynpaw ba ka daw kaba la pynlong ia ka seng ban maramot ia kitei ki ïing, ka dei ka jingsngewkhia ba ka eriong ka la pynjot ia ka ing ka sem jong ki bad kum shi bynta ban iarap lem ka seng ka la shim ia ka rai ban maramot ia kitei ki ing khnang ba kitei ki longing ba shah ktah kin ioh biang ba shong ban sah.

Shuh shuh, u la bynrap ruh da kaba ong ba ka seng ka ai khublei ia ki nongialam bad ki dkhot ka seng kiba la ia synniang pisa lang na ka bynta ban maramot ia katei ka ing bad dei lyngba ka jingkylluid mynsiem ki nongialam bad ki dkhot ka seng la lah ban pyndep ha kaba maramot ia ktiei ki ing kiba la shah pynjot ha ka eriong, u la bynrap.