Shillong, Lber 23: Ka Garo Hills Autonomous District Council (GHADC) hadien 74 snem ka jingiaid lynti naduh ba la seng iaka ha u snem 1952, mynta ka kynti kala shim syndon iaka rai rangbah ban khanglad ia ki bar jylla ban iadon bynta haka election jongka Council da kaba thaw kyndon thymmai haka rules jongka Council ba kino kino ki kyrtong kiban iakhun, ki hap ban don iaka syrnod Scheduled Tribe.

Kum ban pynkynmaw, Kane ka sienjam jongka Council kadei ruh hadien ba ka sorkar jylla kala rai ban pynjlan iaka por treikam jongka Council da hynriew bnai kynthih, hadien ka jingmih ki kynrum kynram bad huri hura ha kine ki khyndiat taiew kiba la dep halor ka jingpyrshah iaka jingioh ki nongshong shnong bar jylla ban iakhun iaka election jongka Council kaba nyngkong la pynbeit ban pynlong haka 10 tarik jong u bnai Iaiong, 2026.

Kane ka sienjam kaba la shim daka Council hapoh ka jingialam jong ka Executive Committee ka seng National People’s Party (NPP) kala ioh ruh iaka jingiaroh na u Conrad K Sangma, Myntri Rangbah ka jylla, uba ong ba kadei shisha ka sienjam kaban sah jingkynmaw haka histori jongka Council kaba la shong session mynta ka sngi.

Mynta ka sngi haka session jongka Council, ka ïing kala mynjur iaka resolution kaban sah jingkynmaw, ha kaba la rai ba baroh ki kyrtong kiba thmu ban iakhun election, kidei ban don iaka syrnod Scheduled Tribe, la ong u Conrad K Sangma.

Ula ong ruh ba kane jingshim rai jongka Council ka long shisha kaba donkam, naba ki District Council hi kidei kyrpang na ka bynta ki trai ri trai muluk jongka thain bad kadei ruh ka jingangnud jong ki paidbah mynta la 74 snem kynthih, hynrei ym pat ki Council kiba lah ban pynurlong ha ki por kiba lah dep.

Ha kane ka kyndon kaba la pynrung thymmai, la thep iaka kyntien jongka jingdon syrnod na ka bynta ban ioh iakhun haka election jongka Council, ka daw kaba la ailad iaki nongshong shnong bar jylla ba kin ioh iakhun iaka election ha kine ki phew snem kiba la leit noh.

Halor kane ka bynta, naka liang u Conrad K Sangma ula buh ruh ka jingkyrpad sha ki nongshong shnong bar jylla ba kin pdiang ia kane ka rai da ka jingjai jai naba ka Council hi la thaw kyrpang na ka bynta ki trai ri trai muluk  bad kyntu ruh ia baroh ba kin ai iaka jingiatreilang naka bynta ka jingshongsuk shongsain ka thain bad ka jylla hi baroh kawei.