Shillong, Jylliew 23:
Uwei u samla uba dang 15 snem ka rta na ka shnong Urkaliar u la ngam jyllop bad shah kit syndon ha ka wah Umkhrah kaba don kham shaneng jong ka jingkieng Urkaliar hynne ka janmiet katba u dang leit jngi sha katei ka wah lem bad ki ngut ki paralok ki jong u.
Katkum ka tyllong khubor ba la ioh lum, la iathuh ba utei u samla hadien ba u la dep ban jngi bad la ki paralok, sa shisien u la leit hiar biang sha katei ka wah ban jngi marwei, namar ka jingjur jong u slap bad ka jingwan ka umsaw, utei u khynnah u la shah rong noh ha ka um bad jah syndon na katei ka jaka.
Na ka liang ki bor pulit ka jylla lem bad ki kynhun jong ka Search & Rescue Team (SRT) bad ka State Disaster Response Force (SDRF) ki la pyrshang ban lapdien ia ka met jong utei u khynnah uba la jah klep ha katei ka wah, hynrei namar ka jingdum jong ka miet, kim banse ban pynsangeh noh shwa bad ka jingpyrshang ban wad ia ka met jong utei u samla, kan sdang biang lashai.
