Nongpoh, Lber 24: Ka ophis jong ka District Tuberculosis Officer, Ri Bhoi District mynta ka sngi ka la pynlong ïa ka jingïarakhe ïa ka World TB Day ha District Library Nongpoh, ryngkat bad ka jingïa sdang ïa ka wat kaba ar jong ka TB Mukt Bharat Abhiyan Campaign, kaba don ïa ka phang “Yes, We Can End TB – Led by Bharat, Powered by Janbhagidari”.
Ha kane ka prokram, u MLA ka Nongpoh, u Bah Mayralborn Syiem, u la long kum u kongsan, ha kaba la synran lang da ka Assistant Commissioner ka Ri Bhoi, ka A. Pradhan, ka District Medical & Health Officer ka Kong A.R. Marak, ka District Tuberculosis Officer ka Dr. E. Kalwing, bad kiwei pat ki ophisar, nangta ki paidbah ryngkat ki Nikshay Mitra kiba ju ai jingïarap da ki marbam sha ki nongpang TB.
Ha kane ka sngi, la sam ruh ïa ki syrnod jingïaroh sha ki riewshimet bad ki kompani kiba la noh synñiang da ki jingbam tei met sha ki nongpang TB, kum ka jingithuh ïa ka jingïarap kaba ki ai ban kyrshan ïa kito kiba dang don hapdeng ka jingshah sumar.
Lah ruh ban pynkynmaw hangne ba ka TB Mukt Bharat Abhiyan ka dei ka prokram kaba thmu ban ai jingïarap sha ki nongpang TB, khamtam ha ka bynta jong ka bam kaba tei met. Ha kajuh ka sngi, la pynlait paidbah ruh ïa ka kali Mobile Medical Unit, kaba yn pyndonkam ban leit sha ki shnong bapher bapher ban ai jingsumar bad jingïarap ha ka jingïakhun pyrshah ïa ka jingpang TB.
Na ka liang ka District Tuberculosis Officer, ka Dr. E. Kalwing, ka la kyrpad ïa ki paidbah, ki nongmihkhmat paidbah bad ki kynhun bapher bapher ba kin wan shakhmat ban kyrshan da ki marbam tei met sha ki nongpang, khnang ba yn lah ban pynduh jait ïa kane ka jingpang ha ki sngi ban wan.
Haba kren ha kane ka jingïalang, u Bah Mayralborn Syiem u la ai jingïaroh ïa ki ophisar bad ki nongtrei ka tnad ka koit ka khiah kiba trei borbah na ka bynta ka bha ka miat jong ka imlang sahlang, khamtam ha ka jingïakhun ban pynduh jait ïa ka jingpang TB. U la kyntu ruh ïa ki paidbah ba kin ym shim sting ïa ki jingpang, hynrei ban shimkhia ïa ka koit ka khiah bad ban pyndonkam hok ïa ki lad jingïarap ba la ai da ka sorkar, da kaba jingïasnohkti lang ban rat diengkhong ïa kane ka jingpang.