Nongpoh. Lber 25: Kum kawei na ka thong jong ka seng ban shakri na ka bynta ki jingdonkam ki paidbah ha ki shnong ki thaw kaba long ka bha ka miat ki paidbah, ka Ri Bhoi Youth Federation (RBYF) Mawrong Circle mynta ka sngi ka la lah ban plie paidbah noh ia ka Jaka ap kali ba la pynshna da ka seng ha ka Shnong Ritiang ha Ri Bhoi District.

Ia kane ka jaka ap kali ne ka passenger shed la wan ban plie paidbah da u Bah R.J Thangkhiew uba dei u Political Secretary ka seng RBYF Sengkmie kum u kongsan bad la don ryngkat lang ruh u Rangbah Shnong ka Ritiang, u Secretary ka RBYF Mawrong Circle u Bah Richard Moksha, u President ka Seng Samla Shnong Ritiang u Bah Kitbok Nongrang lem bad kiwei kiwei ki dkhot ka seng.

Kumba la pynpaw da u Bah R.J Thangkhiew haba plie ia kane ka jaka ap kali na ba la ju tip paidbah kum ka Passenger shed, u la ai ka jingiaroh kaba nyngkong eh ia ka RBYF Mawrog Circle, namar dei lyngba ka jingshim khia ki dkhot bad ki nongialam ka seng la lah ban tei ia kane ka sem ap kali kaba long ka jingmyntoi na ka bynta ki paidbah nongshong shnong.

U la bynrap ruh da ka ba ong ba ka seng RBYF ka dei ka seng kaba ia trei lang bad ki dorbar shnong ryngkat ki paidbah nongshong shnong bad kane ka jingshna ia kane ka sem ap kali ki paidbah ka long ban iarap ia ki nongshong shnong ban lait na u slap ka sngi haba ki leit jingleit ban ap kali.

Shuh shuh, u lakyntu ruh kumba RBYF Mawrong Circle kala leh ia kane ka kam kaba bha kaba long ka jingmyntoi ki paidbah, kiwei kiwei ki Circle bad ki Unit ruh ki dei ban bud ia kane ka nuka, namar ka seng RBYF ka dei kata ka seng kaba ieng ban shakri na ka bynta ban peit ia ka eh ka shong ki paidbah bad ruh na ka bynta ka bha ka miat jong ki paidbah ha Ri Bhoi District, u la bynrap.