Shillong, Lber 25: U Myntri rangbah ka jylla u Conrad K. Sangma mynta ka sngi u la pynpaw ka sorkar jylla kan shim rai ban pynlong ïa ka election MDC ha GHADC, hadien ka sorkar ka la ioh ban ïa mir jingmut bad ki nongïalam ba hakhmat ka Council.

Kane ka jingpynpaw u Myntri Rangbah ka jylla hadien ba la pynjlan ïa ka election MDC ha GHADC, ka dei ruh hadien ba u Lat ka jylla hynnin ka sngi u la dep ban ai ka jingmynjur ïa ka jingpynkylla ka GHADC ïa ka AD Rule ba man la ki kyrtong ne ki nongthep vote ki dei ban don ïa ka syrnod ST ha ka jingïakhun election ne thep vote ha ka election MDC ha GHADC.

Haba kren sha ki lad pathai khubor, u Conrad K. Sangma u la ong, “ ka sorkar kan ap ïa ka por kumno ba kan ïaid, namar kaneka kam kam dei tang ha ka bor ka sorkar jylla bad kum u myntri rangbah u kloi ban ai jingmut na ka liang ka sorkar bad ïa kane dei ban shim khia ka GHADC”.

U la ban khia ruh halor ka bor jong ka Council, da kaba ong, “ Ka District Council ka don la ka jong ka bor ba kyrpang bad namar kata kin ap ruh ïa ka rai jong ka Council ba kum ka sorkar ruh kan don ryngkat bad ki nongïalam ka Council naduh u CEM, ka EC  ba kin shim ïa ka rai khnang ba ka sorkar ruh kan lah ban ïaid shakhmat ïa kane ka kam”.