Shillong, Lber 29: Ki Pulit ka East Khasi Hills ki la ioh ban kem haduh 16 ngut bad kynthup 4 ngut kiba la kynnoh don kti ha ki kam pyniaid dakait ia ki kynthei ha ka jingjurip kaba kynsan Ki pulit ha Nongbah Shillong.

Ia kane la pyntip mynta ka sngi da u SP ka East Khasi Hills u Bah Vivek Syiem, kaba dei hadien ba ki bor pulit ki la ioh pdiang ia ka jingujor na kiba bun ki nongshong shnong halor ki kam pyniaid dakait ha ki jaka ba don ha syndah ki jaka mane blei kaba dei ruh hapdeng ka jingdang kynrei ka jingpang HIV.

La iathuh ruh ba kane ka jingkhynra ki pulit la sdang naduh na Pegasus Hotel ter ter shaduh ka jaka ba pyrshah bad ka SBI Main Branch bad kynthup ruh shaduh sha ki jaka ba pyrhsah bad ka MBOSE Lachumierre bad IGP Point.

Ia kane ka jingleit khynra la ialam da u Additional SP u Bah Ivan Diengdoh  bad la synran lang da ka jingdon u Dy. SP  Joyti Wahlang  bad ki pulit ophisar na Sadar, ki ophisar na ka Women Laitumkrah Police Station bad ha ka jingkhynra ki la ioh ban bat haduh 16 ngut ki briew ba la kynnoh ba ki don kti ha ki kam pyniaid dakait ia ki kynthei.

U Bah Vivek Syiem u la iathuh ruh ba napdeng kitei ki 16 ngut ba la ioh ban bat, 4 ngut ki dei kiba la kynnoh don kti ha ki kam pyniaid dakait bad kiba don ka bynta kaba hakhmat eh ban leh ia kine ki jaid kam kiba long pyrshah ia ka ain. La ong ruh ba ki Pulit ki la ioh ban kurup ruh ia kawei ka Kali Swift Dzire bad 2 tylli ki Scooter kiba pyndonkam ha kine ki jaid kam beain.

Shuh shuh, la iathuh ruh ba ki Pulit ki la dep ban register case ruh ia kitei kiba shah kem ha Sadar Police Station  bad la pynhap ha ka Immoral Traffic (Prevention) Act bad ruh ha ka kyndon ba 110 ka Meghalaya Police Act.