Nongpoh, Lber 29: Ka Ri Lajong Farmer’s Produce Organization ryngkat ka jingiatrei lang bad ka College of Agriculture, Kyrdemkulai ha ka sngi Saitjain ka la pynlong ia ka prorkam kyrpang ban ai jinghikai sha ki nongrep halor ki kam rep kiba khlem da pyndonkam dawai bad ruh ban sam ia ki symbait bad ki tiar rep sha ki nongrep.

Ia kane ka prorkam la pynlong ha Pahambir ha kaba la wan ban shim bynta da u Dean ka College of Agriculture Kyrdemkulai u Dr. Ram Singh kum u kongsan bad la sakhi lang ruh da ka jingdon lang ka Kong Marian Maring, President katei ka seng Nongrep, u Paralad Toor Vice President, ki Scientist, ki Rangbah Shnong bad ki nongrep na ki shnong ba kynthup na ka shnong Mawiong, Pahambir, Nongkhrah bad kiwei ki shnong ba marjan.

Ha kane ka sngi, ki Scientist ne ki riew shemphang halor ka rep ka riang ki la ai ki jingkren ban pynshai sha ki nongrep halor ki buit thymmai ban rep ban riang kaba kum ki nongrep kim donkam ban pyndonkam dawai bad ka sorkar ruh ka pynshlur na ka bynta ka koit ka khiah jong ki paidbah.

La ai jingkren ruh ha kane ka sngi naduh u Dean ka College of Agriculture u Dr. Ram Singh kum u kongsan bad ka Kong Marian Maring kum ka President ka seng Nongrep, ha kaba ki la pynshai shaphang ka rukom rep kaba khlem da pyndonam dawai (Organic Farming) bad kaba la pynkmen ruh ia ki nongrep ha kane ka sngi, ka dei ka jingsam ia ki symbai jingthung bad ki tiar rep sha ki nongrep, kiba pynim ia ka ing ka sem tang ki kam rep ki kam riang.