Nongpoh, Lber 30: Ha ka jingjia ia kynad kaba la jia biang ha ka thaiñ Maikhuli ha khappud ka jylla Meghalaya bad Assam, la kynnoh ba u Rangbah Shnong ka Maikhuli lem bad arngut ki khun jong u bad katto katne ngut ki nongkitkam shnong ki la shah shoh shah dat ha ki briew na Assam na ka shnong Bengali Basti, kane ka jingjia ia kynat la jia ha ka 29 tarik Lber 2026.
Lah ban kdew, ba ka jingiakynad hapdeng ki nongshong shnong ka thaiñ Maikhuli ha khappud jong ka Ri Bhoi District bad ka Assam ki la iai mad ia ki jingjia kiba ktah ia ka shongsuk shongshngaiñ tang namar ka jingiakynad halor ki kam pynroi khamtam ha kaba ia dei bad ka pung dohkha (fishery pond) jong ka Maikhuli ia kaba la pynhap sha Assam ha ka jingiasoi ia ka MoU hapdeng ka sorkar Meghalaya bad Assam.
Katkum ka jingiathuh da u Nicholas Marak, Rangbah Shnong ka Maikhuli, la iathuh ba ha ka step jong ka 29 tarik Lber, la don katto katne ngut ki briew kiba la khot sngewbha ia u khun jong u u Sangwat J Sangma bad u Ricky J Sangma sha ka jaka khawai ha Bengali Basti ka shnong kaba hap ha Assam, hynrei ha ka por ba u dang thmu ban wanphai sha la iing, ki khun jong u ki la shah hiar thma ha ki katto katne ngut ki briew na katei ka shnong kiba la dawa ruh ia ki ban khot ia u Rangbah Shnong ka Maikhuli ban wan sha katei ka jaka.
La iathuh ruh, ba hadien ba u Nicholas Marak lem bad u Ajitabh Barman u ba dei u nongkitkam shnong ki la poi ha katei ka jaka ba la don ka jingshah ktah kti jong ki khun jong u, ha kum katei ka por la wan mih palat 50 ngut ki briew kiba na ka thaiñ Assam ban hiar thma ia ki tad haduh ba ki la mynsaw malu mala bad ban pynlait im ialade ka kynhun kine ki nongialam Shnong ka Maikhuli ki la phet krad noh na katei ka jaka.
Halor katei ka jingjia shah ktah kti bad shah thombor ha ki briew na Assam, na ka liang ki nongialam Shnong ka Maikhuli ki la ujor ia ka ejehar ha Basistha Police Station, Assam bad na ka liang ki bor pulit ki dang pynlong ia ka jingtohkit halor kane ka jingjia.
Shuh shuh ruh, ha kaba ia dei bad ka jingiakynad kaba la nang iai mih ha katei Maikhuli ka shnong khappud jong ka Meghalaya bad Assam, na ka liang u MLA ka Jirang Constituency u Bah Sosthenes Sohtun u la shimkhia ban ia kren bad ki bor pulit ka Meghalaya bad Assam ban pynbeit noh mardor ia kane ka jingiakynad.
