Shillong, Ïaïong 10: Hadien ba la mih ki jingïakhih bad ki jingpyrshah kaba jur ban lilam ïa u Lumgpongdeng ba don ha ka Pung Umiam kumba la lamkhmat da ka Green Tech Foundation kiba la pyrshah jur ban ktah ïa Lumpongdeng na ka bynta ban tei ïa kata ka Taj Resort and Spa, u Myntri rangbah ka jylla u Conrad K. Sangma mynta ka sngi u la pynshai ba ka jingthmu ban tei ïa ka Taj Resort bad ka Spa ka dei ha ki jaka ba la don lypa ha Orchid Umiam bad ruh ban dang kyntiew ïa ki kam pynroi ha Pung Umiam.

“Ka jingtreikam ka tnad Tourism ka dei ka jingtreikam kaba angnud ban wah rah da ki buit treikam ba htymmai. Ban kyntiew ïa ka kam jngohkai pyrthei donkam ban don ki Hotel, ki Five Star Hotel bad kiwei kiwei ki jingshna pynitynad ban pynthikna ba ki paidbah ki dei ban ioh jingmyntoi lyngba ka kam jngohkai pyrthei, lyngba ki ïingsah sah basa kiba donkam haba kyntiew ïa ki kam jngohkai pyrthei”ong u Conrad K. Sangma.

Haba kren halor ka Dewlyngnong  Lumpongdeng ba don ha Pung Umiam, u Conrad Sangma u la pynshai da kaba ong, “ Ba kin nym don kino kino ki jingtei ki ban sahkut duh ha dewlyngngong Lumpondeng, kaba dei katkum ka jingïasoi soskular (MOU) bad ïa katei ka dewlyngnong lumpongdeng yn pyndonkam tang haba don kino kino ki kam kiba pyndonkam tang shipor.

U la ong ruh ba ka jylla Meghalaya ka dei kawei na ka jylla kaba don bun bha ki ingsah basa (Homestays) bad tang kiba la dep shna ki la kot sha ka 800 bad ban yn sa dang shna ruh sa 3000 ha ki snem ban sa wan.

Kumba la mih ka jingsngew na ki paidbah babun ba lang, u Conrad u la pynshai ruh ba ka sorkar kan pynthikna ha kaba kyntiew ïa ka ioh ka kot bad ka roi ka par bad ruh ban don ka jingpeit bniah ba kam dei ban ktah ïa ka mei mariang.