Nongpoh, Ïaïong 11: Na ka bynta ban dang pynklain ban wan rah ïa ka shongsuk shongsain bad ruh ban pyntreikam ïa ki ain ki kanun kum ka kamram ki Pulit ba la pynkupbor da ka sorkar, ka tnad Pulit ka jylla mynta ka sngi ka la kyntiew kyrdan noh ïa ka Byrnihat Police Outpost sha ka kyrdan Police Station ba la wan ban plie da u Myntri sorkar bad uba dei ruh u MLA ka Jirang u Bah Sosthenes Sohtun.

Ïa kane ka jingïalang ban kyntiew kyrdan ïa katei ka Police Outpost sha ka Police Station la pynlong ha IB Byrnihat bad la shim bynta ruh da u DIG ka Eastern Range u VS Rathore, U Superintendent of Police ka Ribhoi u Giri Prasad, Assistant Commissioner u A Marak, u OC ka Byrnihat Police Station u Rubul Ali lem bad kiwei kiwei ki riew Rangbah ka thaiñ.

Kum ban pynpaw, kane ka jingkyntiew kyrdan ïaka Byrnihat Police Outpost sha ka Police Station ka la long shisha ka jingmyntoi kaba khraw ïaki paidbah kiba dang hap hapoh ka jingshakri jong ka, namar ba ïa bun tylli ki kam kiba ïa dei bad ki kam aiñ ki la lah ban pyndep ha katei ka station khlem da donkam shuh ban rah sha kiwei pat ki police Station.

Haba kren ha kane ka sngi kum u kongsan, u Bah Sosthenes Sohtun u la pynpaw ïa ka jingkmen ba la ioh ban kyntiew kyrdan na ka Byrnihat Police Outpost sha ka Byrnihat Police Station, kaba long shi bynta ban dang pynkhlain ïa ki bor pulit na ka bynta ban ïakhun ïa ki kam sniew bad ruh ban wan rah ïa kata ka shongsuk ka shongsain ki paidbah ha ki shnong ba hap ha kane ka Police Station.