Shillong, Jylliew 25: Wat la ka jylla Meghalaya ka la poi sha ki 52 tylli ki snem jong ka jingiaid lynti naduh ba la ioh la ka jong ka jylla ba pura ha u snem 1971 bad kumba long haduh mynta dang don bun ki longing kiba ym pat ioh bording ilektrik ha kylleng ki shnong hapoh ka jylla Meghalaya.
Halor kane ka phang, u MLA ka Mawhati na ka party Congress ryngkat ka kynhun ha ka janmiet jong ka sngi Nyngkong ka taiew ki la leit ban ia kynduh ia u Myntri ka tnad bording Ilektrik, u A.T Mondal ha ka ophis treikam jong u ha Shillong bad na ka liang kane ka kynhun ki la pynsngew ia ka jingeh ki paidbah hapoh ka thain Mawhati na ka jingbym biang thikna ka bording Ilektrik bad ruh dang don bun tylli ki longing kiba haduh mynta kim pat ioh satia ia ka bording ilektrik ha ki ing ki ki sem jongki.
Ha kane ka sngi, na ka liang kane ka kynhun ba la ialam da u MLA ka Mawhati, u Bah Charles Marngar, nalor ba ki la pynsngew ia ki jingshah ktah ki paidbah halor ka jingbym biag ka bording ilektrik ha katei ka thain, ki la aiti ruh ia ka dorkhas sha u Myntri ban un shim khia halor kane ka bynta.
Haba kren sha ki lad pathai khubor, u A.T Mondal myntri ka tnad bording ilektrik, u la ong ba ka sorkar jylla lyngba ka tnad bording ka la shim khia ban thaw ki lad ki lynti halor ka jingbym biang thikna ka bording ilektrik bad ruh ba ka sorkar ka la shim khia ruh ban lum jingtip sha baroh ki longing kiba ym pat ioh bording ilektrik haph ka jylla.
Shuh shuh, u la iathuh ruh ba ka tnad MeECL ka la iaid shaphrang ruh ban pynlong ia ka survey na ka jingwad bniah ia ki baroh ki longing hapoh ka jylla, kiba ym pat ioh bording jingshai ha ki ing ki sem jongki bad na ka liang ka sorkar ka la buh ruh ia ka thong ba naduh u snem 2028 baroh ki longing kiba m don bording ilektrik kin sa ioh noh ia ka brooding ilektrik.
KULAR U MYNTRI KA TNAD BORDING BAN PYNIOH BORDING SHA BAROH KI LONGING BYM PAT IOH BORDING ILEKTRIK HA KA JYLLA
