Nongpoh, Ïaïong 14: U President ka Khasi Authors Society (KAS) u Dr. D. R. L. Nonglait mynta ka sngi haba pynlong ïa ka jingïalang paidbah ha Umsning, u la ther tyngeh ïa ka sorkar Meghalaya halor ka jingbym phah ïa kano kano ka jingthoh sha Ministry of Home Affairs ban dawa ne kyrpad na ka sorkar pdeng ba ka Ktien Khasi haduh kine ki sngi ka dang sahteng ban ioh rung ha ka khyrnit ba phra jongka riti synshar ka ri.

Haba pynshai halor ki jingïaid lynti ka Khasi Authors Society ban dawa na ka sorkar ban pynlong ïa ka Ktien Khasi kum kata ka ktien pdeng ha ka jylla. U Dr.  Nonglait u la ong ba wat ka Ministry of Home Affairs kam don jingtip satia halor kane ka jingdawa, namar na ka liang ka sorkar kam shym la phah ïa kano kano ka jingtoh ban tied jingkhang na ka sorkar pdeng bad ka jingkren u MP ha Parliament kam shym la sei soh ba ka sorkar kam shym la leh ei ei ne phah jingtoh sha ka Ministry of Home affairs, u la ong.

U la ïathuh ruh saw tylli ki ktien na ki jylla shatei lam mihngi ka ri india ki la rung ha ka khyrnit kaba phra ka riti synshar ka ri bad ka sorkar pdeng ha u snem 1950 ka la ai ka jingithuh ïa ka ktien Assamese kum kata ka ktien pdeng ha Assam bad tang ha u snem 2023 ka Ktien Bodo ka la ioh rung ha ka khyrnit kaba pra ka riti synshar ka ri, anmar ki MP bad ka sorkar Assam la phah jingtoh sha ka Ministry of Home Affairs bad nalor kata ki la leit ruh ban ïa kynduh ïa u Myntri Rangbah ka ri bad ym kum ka sorkar Meghalaya kaba ym shym la leh ei ei.

U la ong ruh ha ka jylla Meghalaya ngi hap ban pan ïa ka ktien na u David Scot ban pyndonkam ha ka jylla bad ha ka thungkam ka thung jam naduh ka MPSC, ki DSC, ha kaba wat haduh mynta ba u David Scot u la khlad ngi dang hap pyndonkam ïa ka Ktien English, kaba la long ka jingduhnong kaba khraw ïa ki samla ba ki hap ban pyndonkam da ka ktien nongwei ba ïa ka ktien Khasi ym pat ithuh da ka sorkar pdeng.

Namar kata, u la kyntu ïa ki paidbah ka them Ri Bhoi bad ka jylla bad ïa baroh ki nongshong shnong ba kin ai ka jingkyrshan ïa kane ka mat dawa ba la lamkhmat da ka Khasi Authors Society bad la dei ka por ba ki paidbah ki hap ban mih madan ban pynbor ïa ka sorkar na ka bynta ban ioh rung ka ktien Khasi ha ka khyrdop ba 8 ka riti synshar ka ri, kaba ban long ka jingmyntoi ïa ki samla bad ruh ban im ka jaid byrniew haba im ka ktien.

Ha kane ka jingïalang la wan ban shim bynta lang naduh Dr. R. P. Kharshiing, General Secretary ka Khasi Authors Society, u Bah Cosmas Rynshon, President KAS Nongpoh Unit, u Bah Esmarjune Kharpan, Secretary ka KAS Ri Bhoi unit, Bah Rocky Kylla, Chairman ka Umsning Town Dorbar bad ruh la wan ban kyrshan da ki nongïalam ka KSU North Khasi Hills, ka Confederation of Ri Bhoi People, ka UPF bad ruh ki samla pule na ki kolej bad ki skul bapher bapher ka thain Umsning.