Nongstoiñ, Ïaïong 15: U Myntri Rangbah ka sorkar Jylla u Conrad K Sangma haba ai jingkren ha ka jingïalang plie paidbah ïa ka Multipurpose cum Dorbar Hall jong ka Shnong New Nongstoiñ mynta ka sngi ka 15 tarik u Ïaïong u la ong ba ha ki 8 snem bala leit ka sorkar MDA kala ïohlad ban theh ïa ki kam pynroi haduh kumba 120 tylli kata lyngba ki projek bapher bapher ha kaba ka jinglut kala kot shaduh ka1,315 klur tyngka.

Shuh shuh u la ong ba ka thong jong ka sorkar ka long ba kan nym ïeh shadien ïa kano kano ka District bad ki thaiñ bad kane kam long kaba suk bad u la ong ruh ba u sngewkmen ban ïohi ba ki paidbah ha ryngkat ka sorkar lem bad ki nongïalam khlem da ïa sngew party ne sngew saiñ pyrthei kila ïasnoh kti lang ban shakri na ka bynta ka Jylla.

Ha katei ka jingïalang plie ïa ka Multipurpose cum Dorbar Hall la sakhi da ka jingïadonlang ruh u MLA ka Nongstoiñ u Bah Gabriel Wahlang, u MLA ka Rambrai u R.G Momin ki heh ophisar ka District, ki nongïalam Shnong ka Shnong New Nongstoiñ, ki paidbah bad kiwei kiwei.