Shillong, Iaiong 16: U Myntri rangbah ka jylla u Conrad K. Sangma mynta ka sngi u la kren shai kdar syndon ba ka sorkar jylla kan nym ktah ei ei ia u Lumpongdeng, ha kaba ia dei bad ka Taj Resort and Spa ha Umiam bad ka sorkar kan pyndonkam tang ia ka jaka ba la don  lypa ha Orchid Umiam.

Ia kane la kren shai da u Myntri rangbah u Conrad K. Sangma hadien ka Cabinet Meeting kaba la long mynta ka sngi ha Nongbah Shillong.

Haba kren sha ki lad pathai khubor, u Myntri rangbah u la pynthikna ba ka sorkar kan nym ktah ei ei ia u Lumpongdeng bad kam dei ba ki paidbah kin bishar ne kren bad ka dei ka rai ka sorkar ha kaba ia kane u la dep ban pynshai la bun sien sha ki lad pathai khubor.

“Ym donkam shuh ban ia kren ne ia khih halor kane ka mat kaba ia dei bad u lumpongdeng, namar ka sorkar ka la dep kren shai ba kan nym don ei ei ka jingtei ha u Lumpongdeng bad ia kane ka mat la de ban rai da ka sorkar.

Ha kaba ia dei bad ka jingshah thngan u Chairman ka GTC, u Myntri rangbah u la ong ba ka sorkar ka dep ban bthah ia ka tnad ka koit ka khiah ban shim khia halor katei ka jingshah thngan na ka bynta ban peit bniah ia ka koit ka khiah jong u Chairman ka GTC.

Shuh shuh, u la pynshai ba ka sorkar ruh ka sngewkhia ban pynjot ia ka mariang bad ka hap ban bud ia ki kyndon ba kan nym don kano kano ka jingpynjot ia ka mariang ha kaba ia dei bad kane ka projek ba u la dep ban pynshai ba kin ktah tang ia ki jaka ba hap hapoh ka Orchid Umiam, u la bynrap.