Nongpoh, Ïaïong 20: Halor ka jingshah pyndik bad ka jingshah thombor ki nongshong shnong ha khappud ha ki thain khappud ka Ri Bhoi bad ka Assam kaba la ju jia na ka por sha ka por, ka Hynniewtrep Achik National Movement (HANM) Ri Bhoi District mynta ka sngi ka la leit ban buh syndon da ka dorkhas sha ka ophis u Deputy Commissioner ban kyrpad lem ban shim khia halor kitei ki jingeh ki nongshong shnong ha khappud.

Ha ka jingïalam Vice President ka HANM Ri Bhoi u Bah Sumar Lyngdoh bad u General Seretary u Bah Reynold Dkhar lem bad ki dkhot mynta ka sngi ki la leit ban aiti ïa katei ka dorkhas sha ka Additional Deputy Commissioner ka Ri Bhoi ka Kong Balakyntiew Rani  ba kan ïa kren lem sha u Deputy Commissioner bad ruh sha ka sorkar halor ki mat ba la buh da  ka seng.

Ki mat kiba la pynpaw da ka seng ha katei ka dorkhas ki kynthup ïa ka jingshah pyndik bad ka jingshah thombor ki nongshong shnong ha khappud ha ki bor sorkar ka Assam.

Kumba la pynpaw da u Vice president u Bah Sumar Lyngdoh, la ong ba ka seng ka la ju ioh jingtip na ka por sha ka por ba ki bor sorkar na Assam ki ju pyndik khmtam ka tnad Forest ïa ki nongshong shnong ha khppud bad la don ruh ka jingjia ba wat u Nonghikai u shah kem bad shah bom shah shoh ha ki bor pahara ka tnad Forest na Assam.

Ha kaba ïa dei bad ki jingeh ki nongshong shnong ha kitei ki shnong khappud ba ki ju shah thombor bad shah pyndik ha ki bor sorkar ka Assam, ka seng ka kyrpad jur ïa ka ophis u Deputy Commissioner ba kin shim khia ïa ka kam sha ka sorkar jylla bad shuwa ban jia kiei kiei kiba ktah ïa ki paidbah la donkam ban lum ban lang naduh ki Hima, ki raid bad ki Shnong ban ïa kren halor kane ka jingeh bad khamtam ba ka sorkar kan pynkhlain ruh wat ïa ki bor pahara ha ki shnong khappud, la ong u Bah Sumar Lyngdoh Vice President ka HANM Ri Bhoi District.