New Delhi, Jylliew 25: Ka India bad ka Bangladesh ki la nang iai jam shakhmat ban nang pynkhlaiñ ia ka jingiadei jong kine ki ar tylli ki ri na bynta ban nang pynroi ia ki ri ha ka liang ki lynti iaid, Trade bad ka jingpynkhlaiñ ia ki bor pahara (defence) ban pynbit pynbiang ia ka Indian Ocean bad ban pynheh ia ka thaiñ Indo-Pacific (regions).
Ka Prime Ministers ka Bangladesh ka Sheikh Hasina bad u Prime Minister ka ri India u Narendra Modi ki la nang iai bunkam ban pynbiang ia ka jingiakren pynbeit ia ka jingiadei hapdeng kine ki ar tylli ki ri lyngba ka Delhi bad Dhakha kaba la iaid shakhmat mynta la katto katne snem.ban pynkylla ia ka India bad Bangladesh kum kita ki paralok ba kordor tam (valuable patners).
Ka long ka jingpdiang burom kaba itynnad bha ia ka Prime Minister ka Bangladesh ka Sheikh Hasina ha Nongbah Delhi mynta la jan shitaiew ha ka jingleit jingleit jong ka ha ka sien kaba nyngkong (state visits) da u nongialam (foreign leader) ha kane ka kynti ba u Modi u la shimti biang kum u Prime Minister ha ka wat kaba 3.
Lah ban kdew, ka Hasina ka la sah ha Delhi mynta lajan ar taiew hashwa ka jingbam smai kum u PM ka India da u Modi bad ki la ia kynduh la palat 10 sien ha ka shisnem ban ia kren ia pynbeit ban pynkhlaiñ ia ka jingiadei paralok hapdeng kine ki ar tylli ki ri bad ka la don ruh ka jingkyrmen kaba skhem ba kine ki ar tylli ki ri kin iaid shakhmat ban pynbit pynbiang ha kaba ia dei bad ki kam pynroi, ki kam mang pisa nalor kiwei kiwei.
Ka sienjam bad ka jingiohi jngai jong kine ki arngut nongialam ba hakhmat jong ka India bad Bangladesh ka long kaba shemphang bad kaba don jingmut na bynta ka jingmyntoi jong ki nongshong shnong jong kine ki ri kumba la maitphang ha kane ka jingiakynduh jong ki ha ka 22 tarik u Jylliew.
Ka la don ka jingiakular hapdeng ki ar tylli ki ri ban pyndep noh kloi ia shibun ki kam pynroi ba kynthup naduh ka jingtei ia ki lynti iaid (Connectivity), ba kynthup ruh ia ka jingpynsuk ban leh ia ki kam ba ia dei bad ka Visa, ban pynsuk ia ka kit ka bah ia ki mar ki mata lyngba ki lynti khappud (international borders), ka jingpynbiang ia jingsam bording bad kiwei kiwei lyngba ka cross border energy, ki jingtei building bad ki jingkieng bah.
Ka Bangladesh ka la paw ba ka dei kawei na ki ri kaba ia dei paralok bha ha ka iew ia die ia thied (trade partners). Ka Delhi bad ka Dhaka mynta ki la wanrah ruh ia ka mat kaba la sahteng la slem bha ban pynbeit ia ka jingiasoi ha kaba ia dei bad kam mang tyngka lane ka comprehensive economic partnership agreement (CEPA) lem bad kiwei kiwei ki mat kiba kongsan kiban sa ia soi ruh ia ka agreements hapdeng kine ki ar tylli ki ri.
YN PYNKHLAIN JINGIADEI PARALOK KA INDIA BAD BANGLADESH
