Nongpoh, Iaiong 24: Kum shi bynta jongka jingpynkhreh haba wan ka thma, ki bor ba dei khmih jongka tnad Civil Defence ha ryngkat ki bor pulit, ki shipai, ka tnad jong ka koit ka khiah, ki nonghikai ka Ri Bhoi College, ki ‘riew paidbah, ki khynnah skul lem bad kiwei kiwei de ki tnad treikam sorkar, ki la wan ban iashim bynta haka Mock Drill kaba la ai kyrteng Air Raid Mock Exercise (ARMEX) mynta ka sngi ha Ri Bhoi College, Nongpoh.
Katkum katei ka jingpynkhreh, la ioh jingtip na ka Air Force Station , Shillong ba kala don ka jingshah ther bom lyngba u Long-Range Unmanned Aerial Vehile (UAV) lane u bom drone uba la wan ban her sha ki thain Nongpoh bad hadien kumba katto katne minit, kala don ka jingbthei ha ki bynta jongka liang ka diang jong ka Ri Bhoi College bad na ka liang ki bor pulit ki la wan ban pynlong ia ka jintohkit bad ban ialam ia ki samla pule bad ki nonghikai sha ki jaka rieh tngen lane ki bomb shelter.
La ong ruh ba ha katei ka jingbthei bom, ki bynta jong katei ka College ki la julor khait bad ki la don ruh kiba la mynsaw bad sahkut hapoh katei ka building. Na ka liang ki bor jong ka koit ka khiah lem bad ka kynhun jongka Civil Defense bad Fire & Emergency Services (F&ES) ki la wan poi mar mar ha katei ka jaka ban pyllait im ia kitei ki ba la mynsaw bad ai jingsumar iaki.
