Nongpoh, Ïaïong 25: Haka Sngi Pynkut noh ïaka lympung ïalehkai sports jong ka Ophis u District Sports Ophisar Ribhoi, Ka St. Alfred Sec. School Marngar ka la long ka skul kaba la khur bun tylli ki point ha baroh ki jingïakop bad ka la khur syndon ïaka nam lahduh (Overall Champion) ha katei ka Lympung District Level Inter School Athletics meet jong u snem 2026.

Ïa katei ka lympung ïalehkai sports kaba lai sngi la wan ban pynhap lama noh da u MLA ka Nongpoh kum u kongsan hakaba la sakhi lang ruh da u Bah R Shadap DSEO Ribhoi kum u Symbud Kongsan, E Marak Assistant Commissioner ka Ribhoi, u Bah Bobby L Nongbet District Sports Ophisar lem bad kiwei kiwei.

Naka liang ka ophis u DSO kala sam ruh ïaki khusnam Best Team ha katei ka sngi ha kaba haka kyrdan Under-14 ki kynthei la rah da ka MeECL Secondary School, Kyrdemkulai bad haka liang ki shynrang la rah da ka Nongsangu Secondary School, haka kyrdan U-16 pat haka liang ki kynthei la rah da ka St. Alfred’s Secondary School, Marngar bad ka St. Paul’s Higher Secondary School, Nongpoh haka liang ki shynrang, katba haka U-18 pat la rah da ka Nongtluh Higher Secondary School, Diwon haka liang ki kynthei bad ka St. Paul’s Higher Secondary School haka liang ki shynrang.

Ha kane ka sngi Pynkut, naka liang ka Ophis u DSO ka la pynkupburom ruh ïaki Nongïalehkai sports kiba khur Takma haki Jingïalehkai sports haki kyrdan National Level bad la pyndonburom ruh ïaka kmie jong ka Samla Retina Hanse ka nongïalehkai sports jong ka District kaba dang shu khlad shen.

Naka liang ka ophis u DSO,  ka la pyntip ba ki la dep ruh ban jied ïaki nongïalehkai sports na katei ka lympung ki ban sa leit ïa shimbynta sha ka State Level hakaba kin hap ban pynkhreh bha bad kilan met bha khnang ba kin ioh wan rah ïaka nam jop ha katei ka lympung.