Khliehriat, Ïaiong 25: Ki nongshong shnong jongka Shnongrim kaba hap hapoh ka Elaka Nongkhlieh ha East Jaintia Hills District, kiba dei ruh ki nongrep ha u Lum Syrman, hynnin ka sngi ki la leit ban ai dorkhas sha u Chief Executive Member jongka Jaintia Hills Autonomous District Council ban pynpaw ïaka jingpyrshah jur halor ka jingthmu pynlong ïaka jingïalang pynsngew paidbah lane ka public hearing ha ka 22 tarik u Jymmang, 2026 ha kaba ïadei bad ka jingtih mawshun da ka kompani pynmih dewbilat, ka M/S Shree Cements Ltd ha ka jaka kaba heh 217 hektar ha u Lum Syrman.

Ka jingpyrshah jur jong ki nongshong shnong ïa katei ka jingïalang pynsngew paidbah kadei hadien ba ki la kam ba ym shym la ai satia ka jingtip ba thikna sha ki trai jaka bad kynnoh ruh ba ka sienjam ba la shim da ki bor ka Elaka, ki nongïalam shnong, ka District Council bad ki bor ba dei khmih ka Meghalaya State Pollution Control Board (MSPCB) ka la pynkhein ïa ki hok ki jongki kum ki trai jaka.

Haka jingkynduh bad u CEM ka JHADC hynnin ka sngi, ki nongshong shnong ki la ioh ban ïakren halor ka jingkam trai katei ka M/S Shree Cements Ltd ïa u Lum Syrman bad naka liang u CEM ula jubab ba um shym la don satia ka jingtip ha kaba ïadei bad ka register bad ai kyrteng ïa katei ka jaka kum ka Lum Syrman A, bad ba naka liang ka Council kam shym pat la ai satia ïaka jingbit lane ka permission ha katei ka jaka.

Ha kaba ïadei bad ka jingïalang pynsngew paidbah, u Bah Pynshai Sutnga u la ïathuh ba ki paidbah nongrep ha katei ka jaka, ki la dep ban ujor ïa katei ka jingthmu sha kiba bun ki tnad treikam sorkar ba kynthup naduh ka ophis u Deputy Commissioner ka East Jaintia Hills, Ka JHADC bad ruh sha ka MSPCB ha Shillong ban pynpaw ïaka jingpyrshah jur ka jongki ïa katei ka jingthmu.

U la ong kumba ka District Council kadei kaba khmih ïa ki kam jaka puta, ki paidbah nongrep kila dawa ba ka JHADC kadei ban pyndam mardor ïa katei ka jingthmu pynlong ïaka jingïalang pynsngew paidbah bad ban pynneh ïaka hok jong ki nongrep halor katei ka jaka  kaba ki la kynnoh ba la shu kam trai jubor da katei ka kompani M/S Shree Cements Ltd.

Ki la ban jur ruh ba bun na ki nongshong shnong ha katei ka jaka kidei kiba im haka kam rep kam riang bad kan ri ri ban pynbit pynbiang ïaka ing ka sem bad ong ruh ba katei ka jaka ha u Lum Syrman kadei kaba la long trai da ki ‘riew shimet.

Uwei na ki nongrep ryngkat bad ki nongshong shnong, kila maham jur ruh ba lada ki bor ba dei khmih jongka Elaka ne naka shnong ki ai jingbit ïa katei ka kompani ban tih mawshun, kidei ban shim ïaka jingkitkhlieh pura lada mih kino kino jingjia ba sngewsih hadien habud kane ha katei ka jingthmu pynlong ïaka jingïalang pynsngew paidbah