Nongpoh, Ïaiong 25: Ka lympung ïalehkai sports ki khynnah skul bad kaba la tip kum ka 1st Annual Athletic Sports Meet, ïa kaba la pynlong da ka Klew Resource Centre, Bhoirymbong BRC ha madan Diengsym-ud Mawbseiñ, ka la kut noh hynnin ka sngi hapdeng ka jingishongkun bad kaba la wan ban ïashimbynta da ki 25 tylli ki skul kiba don ha katei ka thain Kyrdem, Ri Bhoi Mihngi.
Ïa katei ka lympung ïalehkai sports ki khynnah skul, la wan ban pynhap pyrda noh da u Damanbait Lamare, MLA Umroi kum u kongsan, ha ryngkat ka jingdon u Bah Alfred Ïawphniaw, BMC Bhoirymbong Block, kum u symbud Kongsan, u A. Sangma, Project Officer of World Vision India, Ri Bhoi ADP, ki rangbah shnong, ki riew rangbah thain, ki nonghikai lem bad ki khynnah skul.
Lyngba katei ka lympung ïalehkai, ki khynnah skul ki la ioh ban ïashimbynta ha ki jait jingïalehkai bapher bapher, kata kiba kynthup naduh na ka kyrdan Secondary, Primary bad Lower Primary.
Haba kren ha katei ka sngi, na ka liang u Damanbait Lamare, u la ai jingïaroh ïa ki nongïalam ka Klew Resource Centre, kiba la lah ban pynlong ïa katei ka Lympung ïalehkai sports na bynta ki khynnah skul, kaba long ruh kum kawei na ki rynsan, ba ki khynnah ki lah ban pyni ïa ka sap kaba ki don ha ki jait jingïalehkai bapher bapher.
Nalorkata, u la kyntu ruh ïa ki khynnah skul kiba la shim bynta ha katei ka lympung, ba ki dei ban pyndonkam hok ïa ka sap kaba ki don ha ki kam ïalehkai bad ha kajuh ruh ka por, u la kyntu ïa ki ba ki dei ban pynleit jingmut bha ha ki jingpule, namar ka jingïalehkai bad ki kam pule ki dei ban ïaid ryngkat ryngkat.
Haba kut katei ka lympung ïalehkai sports, ka Klew Secondary School, ka la long kum kata ka lahduh napdeng baroh ne ka ‘Overall Champion’ nalorkata la khusnam sha kito ki nongjop ha ki jait jingïalehkai bapher bapher bad ha la ki jong ki jong ki kyrdan.