Shillong, Jylliew 25: U President jongka Hynniewtrep Youth Council (HYC), u Bah Roykupar Synrem u la ujor mukotduma pyrshah ia ka tnad Housing ka jylla sha ka Lokayukta, ba kan tohkit bniah halor ka jyrsieh na ka kam thied tin sop ïng kaba la dep ban sam sha ki paidbah lyngba jong ki Block bapher bapher.
Kane ka jing leit ujor jong ka seng sha ka Lokayukta kadei hadien ba ka seng kam hun satia ka jingpynbna jong u myntri ka tnad Housing, u Marcuise N Marak ban pynlong ia ka jingtohkit da ka tnat Housing halor katei ka jyrsieh ha kaba utei u myntri u la kam ruh ba ka jingthied ia ki tin sop ïng, kadei kaba leh katkum ki kyndon kiba la buh da ka sorkar jylla.
Utei u nongialam jong ka seng, u la pyntip ruh ba ia kane ka jingujor la leh kat kum ka kyndon ba 20 jong ka Meghalaya Lokayukta Act, 2014 pyrshah ia ka Directorate jong ka Housing halor ka jingthied ia ki tin sop ïng kiba tad dor bad ki stang shaba palat na kawei ka kompani kaba dei na ka jylla West Bengal ha ka jinglut kaba la kot sha ka T. 20 klur.
“Namar ba ka seng kam hun ia ka jubab u myntri ka tnad Housing, nga kum u nongujor nga la wan ban ujor pyrshah ia ka Directorate jong ka tnad Housing ha ka Meghalaya Lokayukta namar ba baroh ki tip ba ka Lokayukta ka don iaka bor ban tohkit ia ki jingkynnoh bamsap pyrshah ia ki nongtrei ne ki ophisar Sorkar” la ong u Bah Roykupar Synrem.
Ka seng ka la dawa ruh ia ka sorkar ba kadei ban phah pynphai biang ia ki tin kiba la dep pynpoi sha ki Block bapher bapher kiba kynthup naduh ka Jirang, Shella, Nongstoin bad kiwei kiwei de, namar ka jingstang kaba la palat jong ki tin, bad ki bym iahap ruh ban sop ia ki ïng ki sem.
U la ong ruh ba ka seng ka dawa ba dei ban pynshitom ia kiba don bynta ban pynsyrwa kai ia ka pisa u paidbah, namar katkum ka Tender jong ka jingthied ia ki tin sop iing, ka poi ym duna ia ka T. 20 klur bad ki tin ki dei ban don ia ka jingrben kumba 0.45, hynrei ka seng ka iohjingtip pat ba ki tin kiba la thied da ka tnad Housing kidei kiba rben tang da 0.25.
