Nongpoh, Ïaïong 29: Hadien katto katne bnai ba ki pulit ka Ri-Bhoi kila sangeh ïaka jingtalasi naphang ïaki kali pynkheiñ aiñ ha surok naduh ki shaka, khamtam kiba dih kyiad haka por ñiah kali, ki pulit ka Ri-Bhoi hynnin ka miet kila mih biang sha surok ban hikai biang ïaki paidbah tang da ka jingsneng shuwa, ha shuwa ba ki pulit kin shim da ki sienjam ba tyngeh bad ban daiñ kuna.

Ïa kane ka jingtalasi kali la leh hynnin ka miet ha Byrnihat, bala lamkhmat da u Bah Bankerlang Marweiñ kum u DSP, u Rubul Ali OC ka Byrnihat Police Station, u Michael Marak OC ka Nongpoh Police Station lem bad kiwei kiwei ki pulit ophisar. Ha kane ka jingtalasi la snohkti lang ruh da ki dkhot ka RBYF Byrnihat Circle hapoh ka jingïalam u Samla Ricky Lapang President bad u Samla Frankie Ranee Vice President.

Ha kane ka jingtalasi la lap ba bun naki paidbah kila sdang ban leh mon biang hadien ka jingsangeh jong ki pulit ban talasi, ha kaba la lap ba bun ki dei kiba bat bilor kyiad ryngkat u steering, ki bym phong helmet bad kiwei kiwei ki jingpynkheiñ aiñ.

Naka liang u Rubul Ali OC Byrnihat ka Police Station u la ong ba kane ka dei tang ka jingsdang, ka jingsneng bad ka jinghikai ïaki paidbah ba kim dei ban burom ïaka aiñ tang haka por ba don pulit hynrei ban phikir ïala ka jingim bad kiwei de kumjuh bad naka liang ki pulit kin dang bteng ban pynlong biang ïaka jingtalasi nangne shakhmat.

Shuh shuh naka liang kitei ki nongïalam ka RYBF kila ong ba bunsien ki jingjia aksiden ki ju jia ha surok bah tang namar ka jingleh khlemakor jong ki paidbah ki bym burom ïaki aiñ ñiah kali kaba la wanrah ruh ka jingiap briew, hynrei naka liang ka seng ka ai khublei ïaka tnad pulit kaba la shimkhia ban talasi bad ban wer lang ruh ïaki dkhot ka seng ban treilang naka bynta ka bha ka miat khamtam ban lait naki jingjia aksiden.