Khliehriat, Ïaïong 30: Da ka jingtrei shitom bad ka jingbuddien ki Pulit ka East Jaintia Hills halor ka jingshah lute bad shah pynpra ka ATM ka HDFC ha Wapung, East Jaintia kaba la jia ha ka 14 tarik u Ïaiong 2026, Ki Pulit ka East Jaintia Hills ki la ioh kem ïa uwei u runar ba la kynnoh don kti ha katei ka kam na ka jylla Haryana.

Kum ban pynkynmaw, ki runar kiba la leit ban pynpra ïa katei ka kor ATM ki la pyndonkam da ka kor ka bor (Gas Cutter) ban pynpait ïa ka ATM bad ki la ioh rong tuh ruh haduh 9 lak tam bad ki Pulit ka East Jaintia Hills ki la dep an register case ha Khliehriat Police Station kaba dei katkum ka Case NO. 124(04)2026 U/S305/324/331/61(2)/112/3(5) jong ka BNS.

Halor kane ka jingjia bad katkum ka kyrwoh ba la phah da u Superintendent of Police ka East Jaintia Hills, la ong ba da ka jingbuddien thikna ki Pulit halor katei ka jingsha tuh pisa na ka ATM ki la ioh ban kem ïa uwei u runar ba la tip kyrteng kum u Irsad Rumi (32 snem ka rta) na Mewat, Haryana na Tauru, Haryana bad kaba dei ruh da ka jingïarap lang ki Pulit ka Haryana.

Ha ka kyrwoh ba la pynpaw ruh ba une u runar ba la ioh ban kem u dei na ka kynhun ki runar na Mewat kiba don kti ha kaba tuh pisa na ka ATM ha East Jaintia Hills, Ri Bhoi District bad ha North Garo Hills.

Shuh shuh, la pyntip ruh ba kiwei pat ki runar la ioh ban kem bad la register case ha Umiam Police Station katkum ka Case NO. 20(04)2026 u/s 305(a)/331(4)/324(5)/61(2)(b)/3(5) jong ka BNS.