Khliehriat, Jymmang 12: Ka seng United Hynniewtrep Movement (UHM),  East Jaintia Hills District hynnin ka sngi ka la leit buh syndon da ka dorkhas sha u Deputy Commissioner ka East Jaintia Hills u Manish Kumar, ban pynpaw ïa ka jingpyrshah kaba jur halor ka Public Hearing bad ruh ban dawa ban pynsangeh ïa ka Public hearing ka Shree Cement Limited na ka bynta ban buh ïa ka cement plant ha ka shnong Daitstong ba hap ha ka Nongkhlieh Elaka.

Ha kane ka jingleit kynduh la ïalam da u President ka UHM ka East Jaintia Hills u Bah Brosenly Siangshai bad u Secretary u Bah Kyntilang Phwa lem bad kiwei kiwei ki dkhot.

Haba kren sha ki lad pathai khubor, u Bah Brosenly Siangshai, u la ong ba ka seng ka pyrshah ïa katei ka Public hearing bad ruh ban buh ïa ka cement plant da ka Shree Cement Limited ha kaba lada wan buh kita ki Cement plant kan ktah ïa ki nongshong shnong khamtam kiba im ha ka reng ka riang.

U la pynpaw ruh ba lada ailed ban buh cement plant kan pynjaboh ïa ki tyllong umbam umdih, ki wah bad kan pynjaboh ruh ïa ka lyer kaba ktah ïa ki paidbah.

Shuh shuh, u la pynpaw ruh ba lada ka bor district kam sngap ïa ka jingdawa ka seng, ka seng ka hap ruh ban ujor da ka PIL khnang ba ki paidbah nongshong shnong kin nym shah ktah da ka jingwan kane ka Cement Plant.