Tura, Jylliew 26: Tang mar ia saphriang ka video ba la ring dur ia kawei ka jingjia pyrshah ia kawei ka longkmie ha kaba ki paidbhur ki la bom la tied ia ka khlem don shuh ka jingsngewsynei ne ia tip lem, wat hapdeng ka jingdon ruh ki longkmie ha katei ka jaka, kaba la jia ha kawei ka thain jong ka ri lum Garo, u Deputy Commissioner ka West Garo Hills District, u Jagdish Chelani u la pynmih syndon da ka hukum ban pynlong ia ka jingtohkit kaba jur pyrshah ia katei ka jingjia.
Haba ia dei bad kane ka jingjia, ki bor pulit ki la sdang ban pynlong ia ka jingtohkit kaba bniah halor kane ka jingjia ka ba la jia ha kawei ka shnong jong ka West Garo Hills.
Ha kane ka video ba la saphriang bha, la iohi ba ki rangbah briew jong kane shnong ki la shoh naphang ia katei ka riew kynthei bad patan jubor na u shñuih bad bom ruh bom ruh da ki siej kat naba lap khlem don ka jingsynei ia ka wat hapdeng ka jingiam bad jingkyrpad ba kin sangeh bom noh ia ka.
La iohi ruh ia ka jinglong riew dum jong kane ka shnong, ha kaba wat ki longkmie ki ba don ha kane ka jaka ba la jia, kim shim la pynsangeh ne don ka mynsiem sngewsynei ia katei ka lanot, hynrei ki la pynshit bad pynshlur bad kylla long ki nongpeit tamasa.
Lyngba katei ka jignringdur, la ioh ruh la don uwei u riew rangbah u ba la ieng ban pyrshah ban pynsangeh ia kine ki nongshoh dusmon, hynrei u la shah khynniat pynban sharud khlem ka jingpyrwa eiei.
