Nongpoh, Jylliew 01: Ka tnat Public Health Engineering (PHE) Nongpoh Division, mynta ka sngi ka la lah ban plie paidbah noh ia ar-tylli ki Check Dam, ba la tei ha ki bynta ba haneng ki tyllong shim umbam umdih jong ki paidbah, kata kawei ba ki la tei na bynta ka thain Umtyrnga bad kawei pat na bynta ka tyllong tan umbam ki paidbah ha ki shnong kiba don ha ka thain Byrnihat.

Ia katei ka prokram ban plie ia kitei ki Check Dam, la pynlong ha Byrnihat, ha kaba la wan ban plie paidbah da u Bah Sosthenes Sohtun, MLA Jirang bad uba dei ruh u Myntri ka sorkar jylla, ha ryngkat ka jingdon u Chaitanya Awasthi, SDO ka Patharkhmah Civil Sub-division, nangta u Bah U. Kurbah, EE PHE Nongpoh, ka Kong Samanbha Nongbet, SDO PHE Nongpoh, ki nongialam shnong lem bad kiwei.

Ka jingthmu jong ka tnat PHE ban tei ia kitei ki ar-tylli ki Check Dam, ka long ban iada ne khanglad ia ki niut ki nier ba kin poi sha ki Main Dam ne ki tyllong ban tan umbam ban pynpoi sha ki paidbah kiba pyndonkam ia ka umbam umdih lyngba kitei ki tyllong tan umbam.

Sa pule ruh | Shah ktah jur ka ioh kam ki Khasi ba trei haka Projek Stage-3 ka MeECL tang na ka jingkhynra bar jylla ki sengbhalang

Haba iadei bad ka jinglah ban plie ia kitei ki Check Dam, u Bah Sosthenes Sohtun, u la ong lyngba katei ka jingplie ia kitei ki Check Dam, ka la long shisha ka jingmyntoi ia ki paidbah ha ka thain Umtyrnga bad ka thain Byrnihat hi baroh kawei.

U la ong ruh, ba ka jingplie ia kitei ki Check Dam, ka dei ka jingmyntoi ia ki paidbah, khnang ba kin ioh ia ka umbam umdih kaba pahun pahai bad ka umbam umdih kaba pahuh pahai.

Namarkata, kum u nongmihkhmat ka thain, ba un nangtrei shitom shuh shuh ban wad ia ki lad ki lynti na ka sorkar jylla, khnang ban wanrah ia ka jingbit jingbiang halor ka umbam umdih kaba khuid ba suba sha ki paidbah, u la bynrap.

Sa peit ruh