Ka jingmih jong juk stad internet bad ki mobile phone ka la pynsuk shikatdei ia ki paidbah ban phah ki jingthoh lane ki shithi sha ki baieid bathoin, ki bahaing hasem bad ki lok ki jor. Bun na ki khynnah ha kane ka juk mynta, kim tip shuh ei kata ka synduk phah shithi jong ka Ïing Dak lane kata ka post office bad kine ki synduk bun ki la sdang ban jah bad kiba dang sah ruh, ki la sdang sop sarang, naba la kham niar ki briew kiba pyndonkam iaki ha kine ki sngi.
Ha ki por kiba mynshwa, jan manla ki dong bad ki thliew ïing ruh khamtam ha ki jaka sor, ki ju don iala ka jong ka synduk thep shithi ban iohpdiang ia ki shithi kiba la phah da ki bahaing hasem, ki paralok parajor ne wat na ki ophis treikam bapher bapher, bad kine ruh la iohi ba kat nang mih ki sngi ki por, ki la sdang ban jah duh noh suki suki.
Ka jingpyndon ia ka rukom phah shithi bad phah jingtip lyngba ka email, ka whatsap bad kiwei kiwei de ki rukom jong ka juk internet bad ki mobile phone, kala pynlong ia jan baroh ki paidbah ba kin pyndonkam noh da kane ka rukom jong ka juk stad internet kaba sted bad kaba la pynsuk haduh katta katta. Ka jingphah shithi lyngba ka Ïng Dak ha kane ka juk kaba mynta I kumba kam don shuh bad lehse kan iai sah tang ha ki jingkynmaw ia ki por kiba la leit noh.
Ha ka jinglum khubor jong u Meghalaya Post. News, la iohi ia kiba kawei na kum kine ki synduk shithi kaba don ha ka shnong Umdihar, ka la sdang ban kem sarang bad haba pyrshang wad jingtip na ki briew shnong, ki la iathuh ba ymdon shuh kiba pyndonkam mynta bad la shu buh iaka kumto.
Shuh haba pyrshang wad jingtip jong u nongthoh khubor, la lap ruh ba bun ki paidbah khamtam ki khynnah samla ha kane ka juk kaba mynta, kim tip shuh wat tang ia ka shap lane ka logo jong ka ophis ka Ïng Dak ruh, kaba pyni ba kum ka jaidbynriew ngi la nang kiew ha kane ka jingpyndonkam ia ki tekhnoloji bad kaba bunsien ngi kynmaw ia ka Ïng Dak kadei satang haba ngi donkam ban phah ia ki tiar sha kiba bahaing ne ki paralok kiba sah jngai.
