Sa kawei pat ka longkmie na ka jylla, ka la mih shakhmat ban pan jingiarap na ka sorkar bad ki paidbah na ka bynta ba kan ioh ban leit ia shim bynta sha ka 13th Pan Pacific Masters Games 2024, ka ban sa long ha u bnai Naiwieng ha ka nongbah Gold Coast, Queensland jong ka ri Australia.
Kane ka longkmie, kadei ka Kong Wandashisha Dewkhaid na ka shnong Nongsder Ri Bhoi District, kaba la ioh ia ka lad ban mihkhmat ka ri India sha katei ka lympung lem bad i mei ieid Kmoin Wahlang.
Kum ban shu kdew hangne, na ka liang ka sorkar jylla, ka la kular ban bei tyngka ia ka jinglut jingsep jong i mei ieid Kmoin Wahlang ha ka jingkynduh ka jong i bad u myntri rangbah ka jylla, u Conrad K Sangma bad ia u myntri ba dei khmih ia ka tnad ialehkai ka jylla, u Bah Shakliar Warjri hynnin ka sngi ha Secretariat.
Ka Kong Wandashisha Dewkhaid kadei kaba trei kum ka Anganwadi Worker bad kaba la don saw ngut ki khun bad la kha iaka ha ka shnong Mawpet, Mawsynram. Wat la kane ka longkmie kadei kaab sngewtynnad ban mareh bad kaba la mihkhmat ruh sha ki bun ki lympung ha ka jylla bad ka ri bad dang shen ka la leit ban iashim bynta ruh haka ka 1st Pan India Federation Cup National Masters Games 2024, kaba la dep ban pynlong ha Telangana lem bad i mei ieid Kmoin Wahlang. Dei lyngba ka jinglah ban jop ha kane ka lympung ba maka lem bad i mei ieid Kmoin Wahlang, ki la shah jied pat ban leit mihkhmat ia ka ri India sha katei ka lympung iakop mareh kaban sa long ha ka ri Australia.
Ka Kong Wandashisha Dewkhaid haba ioh ban iakren, ka la iathuh ba ka don shisha ia ka jingthrang bad jingangnud ban ioh leit iashim bynta sha katei ka lympung mareh kaban sa long ha ka ri Australia, hynrei ka shem jingeh pat ban ioh pisa, da kaba iathuh ba tang ka bai registration, la hap ban pynlut haduh T. 50 hajar kaba la dei ban siew noh hashwa jong ka 30 tarik mynta u bnai Jylliew nalor kiwei kiwei de ki jinglut bad jingsiew kiba palat T. 2 lak tam hashwa ban kan leit ban lehkai sha katei ka ri nongwei.
Da ka mynsiem jong ka jingsngewrit bad ka jingsngewduh mynsiem, ka Kong Wandashisha Dewkhaid ka pan ia ka jingkyrshan jong ki bor sorkar bad ruh na ki paidbah nongshong shnong jong ka Ri Bhoi bad ka jylla hi baroh ba kin ai lem ka jingkyrshan iaka ba kan ioh ban leit iashim bynta sha katei ka lympung bad ruh ban buh iaka bad ia i mei ieid Kmoin Wahlang ha ki jingduwai ba kin poi sha ka thong jong ka jingjop.
